04.06.2021

Қазақстандық студенттер «Самұрық-Қазына» АҚ компанияларында тағылымдамадан өтеді

Қазақстан астанасында «Самұрық-Қазына» қорының еншілес компанияларында «Цифрлық жаз 2021» бағдарламасы басталды.

Биыл ұйымдастырушылар бакалавриат және магистратура студенттерінен қатысуға 5 800-ден астам өтінім қабылдады. Бұл өткен жылдың көрсеткішінен 2,5 есе артық. Төрт кезеңдік іріктеудің қорытындысы бойынша бағдарламаға қатысуға 53 үміткер шақырылды.

2021 жылы мамандықтар тізімі кеңейтіліп, бағдарламаның конкурстық іріктеуіне тек IT-мамандар ғана емес, сонымен қатар келесі бағыттағы студенттер де қатысты: HR, инженер-технологтар, инженер-механиктер, экономистер, қаржыгерлер, журналистер мен маркетологтар.

Жобаның басталуына арналған баспасөз брифингінде «Самұрық-Қазына» АҚ Стратегия, тұрақты даму және цифрлық трансформациялау жөніндегі басқарушы директоры Ерлан Дұрмағамбетов:

«Бағдарламаның мақсаты бұған дейінгідей айқын - тәлімгерлік арқылы талантты жастарды дамыту және ақылы тағылымдама аясында Қазақстанның жетекші компанияларындағы цифрлы трансформация жобаларында нақты жұмыс тәжірибесі», – деп атап өтті.

«Цифрлық жаз 2021» бағдарламасына Қор тобының 9 компаниясы қатысады: «ҚазМұнайГаз» ҰК» АҚ, «Қазақстан темір жолы» ҰК» АҚ, «Қазпочта» АҚ, «Самұрық-Энерго» АҚ, «Қазақтелеком» АҚ, «KEGOC» АҚ, «Эйр Астана» АҚ, «Қазатомөнеркәсіп» ҰАК» АҚ, «QazCloud» ЖШС.

Қордың атынан жобаның операторы «Самұрық-Қазына» Корпоративтік университеті болып табылады.

«Цифрлық жаз» бағдарламасының әрбір легі – бұл ең алдымен жастардың табысқа жету тарихы», - деп атап өтті Университет директоры Ақмарал Қадырбаева. Ол 2019 және 2020 жылдардың түлектерінің мансаптық жетістіктерімен бөлісті: «KEGOC» АҚ атынан Ержан Есенов пен «QazCloud» қызметкері Сәбина Байжан жазғы тағылымдамадан кейін жұмысқа шақыру алып қана қоймай, мансап баспалдағымен көтерілді.

2020 жылдың түлегі Тахмина Марат жастарды оқытудағы жоба тәлімгерлеріне алғысын білдірді:

«Тәлімгерлерсіз біз белестерді еңсере алмас едік. Олар бізді бүкіл тағылымдама кезінде қолдаумен болды. Ұжымда бейімделуге, жұмыс процестерін түсінуге көмектесті, жобаларды іске асыру және мәселелерді шешу үшін ең қолайлы жағдай жасады».

Ұйымдастырушылар «Цифрлық жаз» тағылымдама бағдарламасы әрбір қатысушыға нақты оқиғалар қойнауына бойлауға және құнды тәжірибе алуға мүмкіндік беретінін атап өтті: бизнес алдында тұрған міндеттерді шешу, коммуникациялық дағдыларды дамыту, басқа қатысушылармен нетворкинг, оқытудан өту және Хакатон шеңберінде компаниялардың өзекті кейстеріне арналған шешімдерді ұсыну.

Анықтама:

«Цифрлық жаз» бағдарламасы 2018 жылдан бері іске асырылуда

Тағылымдама 3 айға есептелген

Жобаға бакалавриаттың 3-4 курс және магистратураның 1-2 курс студенттері қатысады

Бағдарламаға қатысушылар - қазақстандық және шетелдік жоғары оқу орындарының студенттері, Қазақстан Республикасының азаматтары

2018 жылдан бастап 10 211 үміткер қатысуға өтінім берді

Бағдарламаны 122 тағылымдамадан өтуші аяқтады

Бағдарламаның 54 түлегі жұмысқа шақыру алды

2021 жылы 5 868 үміткер өтінім берді, олардың ішінен тағылымдамадан өту үшін 53 қатысушы іріктелді

 

«Самұрық-Қазына» АҚ Қоғаммен байланыс департаменті

Айдарлар мұрағаты