Жаңартылды: 15.08.2018, 16:13 (АСТ)

16.11.2016

Алдағы бірер жылда Павлодар облысында сумен қамту нысандарын салу жоспарланып отыр


Павлодар. 16 қараша. ИНТЕРФАКС-ҚАЗАҚСТАН – Павлодар облысында алдағы үш жылда су құбырларын тарту жоспарланып отыр, деп хабарлайды облыс әкімдігінің баспасөз қызметі.

Аймақтық Экономика және бюджетті жоспарлау басқармасы жетекшісі Мақсат Тұрлыбаевтың айтуынша, «Тірек ауылдарды дамыту жөніндегі кешенді жоспарға 17 ауылда сумен қамту нысандарын салу және 22 ауылға су құбырларын тарту жұмыстарының жобалық-сметалық құжаттарын әзірлеу шаралары енгізілген», делінген хабарламада.

Осы бағытта Успенск ауданына бюджеттен қомақты қаражат бөлінбек. Атап айтқанда, 2016-2017 жылдары Константинов ауылында су құбырын тартуға 692,6 млн теңге, Қоңыр өзек ауылына – 575,7 млн теңге, Лозовое ауылына 2019 жылы 692,6 млн теңге бөлу көзделген.

Аймақ басшысы Болат Бақауов әрбір тірек ауылдың су құбырына деген сұранысын жан-жақты зерттеуді тапсырды.

«Мысалы, мен луганскіде болдым. Ауыл әкімімен және ауылдағы негізгі кәсіпорын басшысымен сөйлестім. Олар ауылға орталықтандырылған су құбыры қажет емес, өйткені, адамдар шахталық құдық суын ішіп үйренгенін айтады. Одан да көшелерімізге асфальт төсеңіздерші, деп отыр. Сондықтан, әрбір тірек ауылдың проблемасын жеке-жеке сараптап, жергілікті тұрғындарға не қажеттігін анықтауды тапсырамын», - деді ол.

Сонымен қатар, аймақ басшысы Павлодар облысындағы аудандар мен қала әкімдерінен тірек ауылдардың әрқайсысына қатысты даму жоспарын әзірлеуді талап етті. Олар өз ұсыныстарын 2016 жылдың соңына дейін аймақ басшысына таныстыруы тиіс.


Айдарлар мұрағаты

Баспасөз орталығы



Error message here!

Show Error message here!

Close