20.10.2016

Павлодардағы инвестициялық форумда 220 млрд теңгенің келісіміне қол қойылуы тиіс

Павлодар. 20 қазан. ИНТЕРФАКС-ҚАЗАҚСТАН – Қараша айының басында Павлодарда өтетін «Ертіс Инвест-2016» форумында жалпы құны 221,7 млрд теңгелік 7 коммерциялық келісімге қол қойылмақ. Бұл туралы бейсенбідегі брифингте облыстың Индустриалды-инновациялық даму басқармасы бастығы Нұрболат Сейітмағамбетов хабарлады.

«Инвестицияляқ форум шеңберінде пленарлы отырыс өтеді. Алты секция жұмыс істейді. Жастар кәсіпкерлігін дамыту, отандық АӨК-дегі кооперацияның рөлі, аймақтық экономикаларды дамыту, мемлекет-жеке меншік серіктестікті дамыту, ЕЭА мен көлік-логистикалық әлеуетін дамыту мәселелері талқыланады», - деді Н.Сейітмағамбетов.

Жоспар бойынша, форумға 500-ден астам адам қатысады. Олардың арасында Инвестиция және даму министрлігі, энергетика, Ауыл шаруашылығы, Ұлттық экономика министрліктерінің, даму институттары мен ұлттық компаниялардың, сондай-ақ, отандық және шетелдік бизнес өкілдері бар.

Инвестициялық форум Павлодарда осымен үшінші жыл қатарынан өткелі отыр. 2014 жылы 38,8 млрд теңгенің, 2015 жылы 509,8 млрд теңгеге келісім бекітілген болатын.

Н.Сейітмағамбетовтің айтуынша, «былтыр негізінен ынтымақтастық ниеті жөніндегі меморандумдар бекітілген болса, алдағы форумда инвестициялық жобаларды іске асыру жөніндегі белсенді келісімдерге қол қойылмақ».

Айдарлар мұрағаты