26.08.2016
Қытайлық Hubei Yihua Group Ltd компаниясы мен Павлодар облысының әкімдігі кальцилендірілген сода шығаратын зауыт салу жөнінде келісті
Павлодар. 26 тамыз. ИНТЕРФАКС-ҚАЗАҚСТАН – Павлодар облысының әкімі Болат Бақауов қытайлық Hubei Yihua Group Ltd компаниясы басшысы Цзян Юань Хуамен кездесті. Кездесуде облыс аумағында кальцилендірілген сода шығаратын зауыт салу және өзара ынтымақтастық мәселелері талқыланды, деп хабарлайды аймақ басшысының баспасөз қызметі.
«Облыс географиялық жағынан ыңғайлы орналасқан, табиғи ресурстарға бай, өндірістік база, көлік-логистика инфрақұрылымы жақсы дамыған, бос жатқан өндіріс алаңдары мен жер телімдері түрлі жобаларды іске асыруға мүмкіндік береді. Оған қоса, еңбек ресурстары да жеткілікті. Мұны облыстың инвестициялық тартымдылығын арттыра түсетін факторлар деуге болады. Павлодар облысы аумағында кальцилендірілген сода зауытын салу іскерлік байланыстарды дамытуға серпін берері сөзсіз», - деді Б.Бақауов, делінген хабарламада.
Сонымен қатар, ол облыс аумағында жұмыс істеп жатқан «Павлодар» арнайы экономикалық аймағы жайлы сөз қозғады. Айтуынша, салықтық жеңілдіктер мен АЭА аумағындағы инфрақұрылымдар инвестордың жұмыс істеуіне қолайлы жағдай жасамақ.
Өз кезегінде, қытайлық компания басшысы Hubei Yihua Group Ltd холдингінің Қазақстанмен ынтымақтастық орнатуға мүдделі екендігін алға тартты.
«Мен Қазақстанға тұңғыш рет келіп отырмын. Мұны әзірге танысу сапары десем де болады. Әрине, біз сіздермен ынтымақтастық орнатып, аталған жобаны іске асыруға мүдделіміз», - деді Цзян Юань Хуа.
Облыс әкімінің баспасөз қызметі таратқан хабарламаға сүйенсек, 2015 жылы аймақ пен ҚХР арасындағы тауар айналымы 600 млн долларға жуықтаған. Негізінен Қытайдан қондырғылар импортталған. Ал, Қытай Павлодар облысынан полипропилен мен күнбағыс дәнін алады екен.
Қытайлық Hubei Yihua Group Ltd холдингі ҚХР-да мұнай-химия өнімдерін өндіру жағынан екінші орын иеленеді. Компанияның жылдық айналымы 15 млрд доллар. Каустикалық сода шығару жағынан әлемдегі ірі өндірушілердің бірі болып табылатын холдингтің негізгі қызметі – тыңайтқыш өндіру. Компания жылына 13 млн тонна тыңайтқыш шығарады.
Айдарлар мұрағаты
