Жаңартылды: 16.08.2018, 17:51 (АСТ)

17.08.2016

2016 жылы Павлодар облысында ауылдарды дамытуға 7 млрд теңгеге жуық қаржы жұмсалмақ


Павлодар. 17 тамыз. ИНТЕРФАКС-ҚАЗАҚСТАН – 2016 жылы Павлодар облысындағы тірек ауылдар мен аудан орталықтарын дамыту бағдарламасын іске асыруға 6,8 млрд теңге жұмсалады. Бұл жоспарланғаннан 1 млрд теңге артық, деп хабарлайды облыс әкімдігінің баспасөз қызметі.

Хабарламаға сүйенсек, облыс бойынша аталған бағдарламаға 31 елді мекен енген. Ол даму әлеуеті бар елді мекендердің аяқтан тұруына көмектесуге бағытталған.

Кешенді жоспар бес бағыт бойынша іске асырылады. Бірінші бағыт қаржыландыруды қажет етпейтін ұйымдастыру шараларынан тұрады. Екінші бағыт бойынша экономикалық қызметті дамыту жоспарланған. Биылғы жылы жалпы сомасы 4,1 млрд теңгеге жуықтайтын 105 шара өткізу ойда бар. Оның 2,3 млрд теңгесі немесе 57,6 пайызы (64,1 млн теңге республикалық, 2,2 млн теңге жергілікті бюджеттен, 2 млрд 272,2 млн теңге өз қаржысы есебінен немесе заем есебінен алынды) биылғы жылдың бірінші жартысында игерілді.

Баспасөз қызметінің мәліметінше, үшінші бағыт – әлеуметтік және инженерлік инфрақұрылымды дамытуды көздейді. Ол бойынша жалпы құны 2 млрд теңгелік 164 іс-шара іске асырылмақ. Бүгінде оның 465,3 млн теңгесі немесе 23,1% (республикалық бюджет - 198,9 млн теңге, жергілікті бюджет - 127,9 млн теңге, өз қаржысы мен заем - 138,5 млн теңге) игерілген.

Төртінші бағыт бойынша сату және қамтамасыз ету рыноктарына дейін қатынайтын транспорт желісін дамыту. Осы бағыт бойынша атқарылатын 38 іс-шараның жалпы сомасы 717,8 млн теңгені құрамақ. Бұл шаралар іске асырылған жағдайда 138 жұмыс орны ашылады. Қазіргі таңда 106 млн теңге немесе жалпы соманың 15% игерілді (республикалық бюджет - 13,1 млн теңге, жергілікті бюджет 92,8 млн теңге). Игеру көрсеткішінің төмендігі мемлекеттік сатып алулар жөніндегі конкурстық тәртіптемелердің ұзақтығына және жұмыстың екінші жарты жылдықта аяқталуына байланысты.

Бесінші бағыт – мемлекеттік және коммерциялық қызмет көрсететін орталықтар ашу және оларды дамыту. Бұл бағыт бойынша 46,3 млн теңгенің көлемінде 27 іс-шара өткізу жоспарланған. Қаржының 25,8 млн теңгесі немесе 55,7% (республикалық бюджет 22,7 млн теңге, жергілікті бюджет 0,1 млн теңге, заем және өз қаржысы - 3 млн теңге) игерілді.

Облыс әкімі Болат Бақауовтың айтуынша, тірек ауылдар мен аудан орталықтарын дамыту жөніндегі бағдарламаны іске асыру үшін бөлінген қаржы тұралап қалған ауылдарға емес, даму мүмкіндігі орташа және жоғары елді мекендерге бағытталуы тиіс. «Тым болмаса барлық талаптарға жауап беретін бес ауылды дамытуды алдымызға мақсат етіп қояйық. Үлгі ретінде Евгеньев ауылдық округін алуға болады. Онда мәдениет үйі жөндеуден өткізілді, бұрынғы асхана ғимаратын жөндеп, бала-бақша аштық, орталық көшелерге асфальт төсеп, алты үй, бірнеше көкөніс қоймасын, сүт-тауар фермасын аштық. Енді ауылды сумен қамту мәселесі қалды. Сонымен тірек ауылды дамыту міндеті орындалады», - деді Б.Бақауов.


Айдарлар мұрағаты

Баспасөз орталығы



Error message here!

Show Error message here!

Close