Жаңартылды: 17.08.2018, 17:34 (АСТ)

12.08.2016

Инвесторлар «Павлодар» арнайы экономикалық аймағында жалпы құны 130 млрд теңге болатын жобаларды іске асыруға келісім берді


Алматы. 12 тамыз. ИНТЕРФАКС-ҚАЗАҚСТАН – «Павлодар» арнайы экономикалық аймағында іске асырылатын жобаларға салынатын инвестиция көлемі 2020 жылға қарай бірнеше есе артады. Бұл туралы «Павлодар» АЭА басқарушы компания» АҚ басқарма төрағасының міндетін атқарушы Александр Зореев хабарлады.

«2020 жылға дейін инвесторларымыз уәде берген жобалардың тым болмаса жартысы іске асырылатын болса біз кем дегенде 260 млрд теңге инвестиция межесіне жетеміз деп ойлаймын. Қазір біздегі инвестиция көлемі 43,6 млрд теңге», - деді А.Зореев жұма күні Алматыда Павлодар облысының инвестициялық әлеуетін таныстыруға арналған жиында.

Айтуынша, бүгінгі таңда «Павлодар» АЭА нысандарда нақтыланған инвестиция көлемі 130 млрд теңгені құрап отыр. Болашағы зор инвестициялық жобалардың қатарында логистика орталығының құрылысын атап өтуге болады, деді ол.

«Дүйсенбі күні осы жобаның тұсаукесерін өткіземіз. Бұл жоба бойынша Павлодардан арнайы экономикалық аймаққа дейін темір жол тартылып, логистика орталығы салынады. Жоба құны шамамен 12 млн долларға жуықтайды. Қазір бізде дайын инфрақұрылымның бір бөлігі бар, кеден терминалдары да, бос жер де бар», - деді А.Зореев.

Терминал Қазақстанның Ресей федерациясымен шекарадағы жалғыз логистикалық орталығы болмақ. Кешеннің жобасын жасау жұмыстары биыл басталды. Құрылыс 2017 жылы басталып, 2018 жылы аяқталуы тиіс.

«Павлодарда жеке меншік инвесторымыз да бар. Қазір біз онымен келіссөздер жүргізіп жатырмыз. Сондай-ақ, бұл жобаға Шымкент кәсіпкерлері де қызығушылық білдіріп отыр», - деді А.Зореев.

Өз кезегінде Павлодар облысының әкімі Болат Бақауов өңірде ауыл шаруашылығы және туризм салаларының инвесторлар үшін тартымды болып отырғанын атап өтті. Облыс басшысы аймақта дайын кадрлар барын, оның логистикалық және энергетикалық ресурстарының қолжетімділігін алға тартты.

«Инвесторларға жан-жақты қолдау мен көмек көрсетуге мен өзім кепілдік беремін», - деді Б.Бақауов.


Айдарлар мұрағаты

Баспасөз орталығы



Error message here!

Show Error message here!

Close