11.08.2016

Мәжіліс депутатцтары Павлодар облысындағы жоғарғы оқу орындарының кәсіпкерлік-инновациялық инфрақұрылымдарымен танысты

Павлодар. 11 тамыз. ИНТЕРФАКС-ҚАЗАҚСТАН – Мәжіліс депутаттары Павлодар облысына сапары барысында жергілікті жоғарғы оқу орындары негізінде құрылған Startup академиядағы жастар жобаларымен танысты. Бұл туралы бейсенбі күні облыстық Ішкі саясат басқармасы хабарлады.

Хабарламаға сүйенсек, мәжіліс депутаттары Айгүл Нұркина мен Айзада Құрманова Павлодардағы үш ЖОО-ың кәсіпкерлік-инновациялық инфрақұрылымдарымен танысты. Халық қалаулылары ғылыми жобалардың инновациялық тәсілдер мен заманауи әдістемелер негізінде іске асырылып жатқанын атап өтті, делінген хабарламада.

Инновациялық Еуразия университетінде мәжіліс депутаттары жастар және әлеуметтік бастамалар орталығының тұсау кесер рәсіміне қатысты. С.Торайғыров атындағы Павлодар мемлекеттік университетінде «River plus» және «Биотехплюс» старт-ап жобалар таныстырылды.

«Аймақтық Startup академияларда студенттер, рационализаторлар мен облыстағы жас кәсіпкерлерге білім алуға мүмкіндік бар. Сонымен қатар, оларға жобаларын іске асырудың барлық сатысынан бастап, өз бетінше бизнес жүргізу жағынан толық қолдау көрсетіледі», - делінген хабарламада.

Оған қоса, «Ақсу ферроқорытпа зауытындағы өнеркәсіп қалдықтары негізінде көмірсутегі шикізатын тереңдете өңдеудің жаңа катализаторларын дайындау» атты ғылыми жоба депутаттар тарапынан ерекше қызығушылық тудырды.

«Аталған ғылыми жоба қазіргі заманға ауадай қажет. Ғалымдар студенттермен бірлесіп осыны іске асырады және оған патент алады деп үміттенемін», - деді А.Құрманова.

Кездесуде ЖОО-ың профессорлар мен оқытушылары ғылыми тәжірибелерге және студенттер мен магистранттардың халықаралық конференцияларға қатысуына қаржы бөлуге көмектесуді сұрады.

Айдарлар мұрағаты