21.07.2016

Павлодар облысының билігі Ресейден көшіп келгісі келетін репатрианттарды жұмыспен қамтуға дайын

Павлодар. 21 шілде. ИНТЕРФАКС-ҚАЗАҚСТАН – Павлодар облысының билігі Ресейге көшіп кеткен, бірақ елге қайтып оралғысы келетіндерді жұмыспен қамтуға дайын, деп хабарлайды облыс басшысының баспасөз қызметі.

"Аймағымызға қандай мамандар қажеттігін нақтылау қажет. Қажет болса Қазақстанда тұрып, жұмыс істегісі келетіндерді жұмыспен қамту қажет", - деді əкім Болат Бақауов, делінген хабарламада.

"ЭМПК" ЖШС шаруа қожалығы басшысының айтуынша, бір кезде Ресейге көшіп кеткен "бұрынғы жерлестеріміз жұмыс болса елге қайтып оралуға дайын". Мəселен, бір ғана Волгоград облысында осындай он отбасы тұрады. Олардың арасында зоотехник, агроном, механизатор сынды мамандар көп.

Екібастұздағы бірқатар кәсіпорынды аралаған Б.Бақауов жергілікті кәсіпкерлер мен тұрғындарды алаңдатып жүрген проблемалармен танысты.

Сонымен қатар, аймақ басшысы "Fonet Er – Tai AK Mining" ЖШС мыс концентратын өндіретін фабрикасында да болды. Кәсіпорын жетекшілерінің сөзіне сүйенсек, фабриканы толық қуатына шығару үшін руда жетпейтінін айтып отыр. Құрылтайшылар жаңа кеніштерді дамытуға бағытталған инвестициялық жобаларға қаржы салуға, облыс əкімі ұсынған жобаларды іске асыруға дайын.

Айдарлар мұрағаты