07.07.2016

Павлодар облысы және Алматы азық-түлік тауарларын тікелей тасымалдау жөнінде келісті

Павлодар. 7 шілде. ИНТЕРФАКС-ҚАЗАҚСТАН – Павлодар облысының кәсіпкерлік, сауда және туризм басқармасы мен Алматының кәсіпкерлік, индустриалды-инновациялық басқармасы азық-түлік тауарларын тікелей тасымалдау туралы меморандумға қол қойды, делінген облыс әкімінің баспасөз қызметінен таралған хабарламада.

"Құжат екі аймаққа импорталмасуды қамтамасыз етуге және делдалсыз өнім өткізуге, соның нәтижесінде тауарлардың бағасын төмендетуге мүмкіндік бермек», делінген хабарламада.

Павлодар облысы делегациясының қатысуымен өткен келіссөздерге елуге жуық кәсіпорынның өкілдері қатысты, оның ішінде облыстың өнеркәсіптік және ауыл шаруашылығы секторының 15 кәсіпорны бар. Алматы әкімінің орынбасары Ерлан Әукенов Алматының сауда желілері арқылы азық-түлік өнеркәсібінің тауарларын сатуда Павлодар облысының үлкен әлуеті бар екендігін атап өтті. Павлодар жағы алматылық бизнес-қоғамдастықты Павлодар облысына инвестиция құюға шақырды.

Алматының "Magnum Cash&Carry", "Рамстор" және "Carrefour" сауда желілері Павлодардан келген бизнесмендер үшін тауарларды орау мен сертификаттау жөнінде мастер-класс өткізді. Павлодарлық "Крендель" ЖШС алматылықтарға кондитерлік өнімдерін және Алматыда "Крендель" брендін ілгерлету үшін франшиза сатып алу мүмкіндігін ұсынды.

Сонымен қатар «Бизнестің жол картасы- 2020» бірыңғай бағдарламасы бойынша грант алушы "Mirstankov" ЖШС алматылық рынокқа шығу мақсатында металл станоктарын шығару жөнінде рәсім өткізді.

Айдарлар мұрағаты