23.06.2016

«АгроХимПрогресс» компаниясы «Павлодар» ЕЭА аумағында агрохимиялық өнімдер өндіретін кәсіпорынды іске қосты

Павлодар. 23 маусым. ИНТЕРФАКС-ҚАЗАҚСТАН – «АгроХимПрогресс» компаниясы «Павлодар» ЕЭА аумағында минералды тыңайтқыштар мен өсімдіктерді қорғайтын химиялық құралдар шығаратын кәсіпорынды іске қосты. Бұл туралы бейсенбі күні «Интерфакс-Қазақстан» агенттігіне облыс әкімдігінің баспасөз қызметі хабарлады.

Жобаның жалпы құны 3,2 млрд теңгені құраған.

«АгроХимПрогресс» ЖШС минералды тыңайтқыштар мен өсімдіктерді зиянкестерден қорғайтын химиялық құралдар өндірісін жолға қойды. Атап айтқанда, эфир, пестицидтер, өсімдіктерді зиянкес жәндіктерден қорғайтын сулы-түйіршік түріндегі құралдар, сондай-ақ, сыйымдылығы 20 литрлік полиэтилен канистрлер шығарылады», - делінген хабарламада.

Кәсіпорынның жобалық қуаты жылына 11 мың тонна өнім өндіруге жеткілікті.

Баспасөз қызметі таратқан мәліметтерге сүйенсек, қазір жобаның алғашқы сатысы толық іске асырылған. 2018 жылға қарай кәсіпорын шегірткеге қарсы биопрепараттар өндіретін цех пен глифосат шығаратын цехты іске қосуды жоспарлап отыр.

«АгроХимПрогресс» ЖШС өнімдерін агроөнеркәсіп кешені субъектілері тұтынады.

«Павлодар» ЕЭА химия және мұнай-химия саласын дамыту мақсатында 2011 жылдың қараша айында құрылған болатын. Бүгінгі таңда Қазақстанда барлығы 10 ЕЭА жұмыс істейді.

Айдарлар мұрағаты