19.06.2015

2015 жылы Павлодар облысында жеті дәрігерлік амбулаторлық және перинаталды корпус ашылады

Павлодар. 19 маусым. ИНТЕРФАКС-ҚАЗАҚСТАН – 2015 жылы Павлодар облысында жеті дәрігерлік амбулаторлық және перинаталды корпус ашылады. Бұл туралы облыс әкімі Қанат Бозымбаев мәлімдеді.

«Адамдардың игілігі жолында медицина қызметкерлерінің атқарып жатқан еңбегі зор. Сіздерге Қазақстанның келешегі үшін зор жауапкершілік жүктелген. Сіздер адамның басты байлығы – өмірі мен денсаулығын қорғауға аянбай күш салып келесіздер. Медициналық қызмет сапасын жақсарту бағытында атқарылып жатқан жұмыстар павлодарлықтардың денсаулығына жағымды әсер ете бастады», - деді Қ.Бозымбаев бейсенбі күні медицина қызметкерлерінің мерекесіне орайластырылған жиында.

Әкімнің айтуынша, биылғы жылы аймақта 100 орындық жеті дәрігерлік амбулаторлық және перинаталдық корпус ашылады.

Шара барысында медицина саласының үздік қызметкерлері Қазақстан халықтары ассамблеясы мен облыс әкімінің мақтау грамоталарымен және алғыс хаттармен, Денсаулық сақтау министрлігінің «Еңбек ардагері» медальдарымен марапатталды.

«Алтын скальпель» номинациясы бойынша Павлодар қалалық №3 ауруханасының хирургия бөлімі меңгерушісі Солтанғазы Масғапов, «Алтын фонендоскоп» номинациясы бойынша облыстық диагностикалық орталықтың консультация бөлімі меңгерушісі Гүлжан Саламбекова, «Қолының шипасымен өмір сыйлаған» номинациясы бойынша Павлодар қалалық №1 ауруханасының анестезиология және жан сақтау бөлімі меңгерушісі Олег Гарбузенко, «Үздік медицина мекемесі» номинациясы бойынша Павлодар облыстық ауруханасы марапатталды.

Сонымен қатар, денсаулық сақтау саласын дамытуға үлес қосқан бірқатар қызметкерлер құрметті атаққа ие болды.

Айдарлар мұрағаты