04.06.2015

Павлодар және Маңғыстау облысының билігі ынтымақтасуға келісті

Павлодар. 4 маусым. ИНТЕРФАКС-ҚАЗАҚСТАН – Павлодар және Маңғыстау облысының билігі ынтымақтастық туралы екіжақты меморандумға қол қойды, деп хабарлады Павлодар облысы әкімшілігінің баспасөз қызметінен.

Құжаттың мақсаты-аймақтар арасында ынтымақтастықты дамыту және одан әрі нығайту, сондай-ақ облыстардың бәсекеге қабілеттілігін арттыру.

Құжатта тиімділігі жоғары және инновациялық өнеркәсіптік өндірістерді құруға ықпал ету, "Павлодар" арнайы экономикалық аумағы мен «Ақтау кемежайы" арнайы экономикалық аймағы аумақтарында бірлескен инвестициялық жобаларды жүзеге асыру үшін бизнесмендерді тарту, шағын және орта бизнесті дамытудың басымдық бағыттары бойынша тәжірибе алмасу, бірлескен жәрмеңке, көрме және сауда-экономикалық миссияларды ұйымдастыру арқылы облыстардың аумақтарында шығарылатын тауарлар мен көрсетілетін қызметтерді ілгерлету көзделген.

Экология саласы бойынша тараптар табиғатты пайдалануды реттеу, экологиялық проблемаларды шешу, табиғатты қорғау, су ресурстарын қорғау, пайдалану және реттеу, орман шаруашылығын реттеу шараларын жүзеге асыру мәселелері бойынша тәжірибе алмасатын болады.

Сондай-ақ Маңғыстау облысына ауыл шаруашылығы өнімдерін тасымалдау ұйымдастырылмақ, емдеу мекемелерінің мамандарын алмастыру көзделген , мәдениет мекемелері арасында өз ара ынтымақтастық орнату көзделген.

Айдарлар мұрағаты