23.12.2014
Павлодар облысының кәсіпорындары ЕХРО-2017 нысандарын салуға қажетті өнімдерді жеткізіп береді
Павлодар. 23 желтоқсан. ИНТЕРФАКС-ҚАЗАҚСТАН – «Астана ЭКСПО-2017» ұлттық компаниясы» АҚ мен Павлодар облысы өзара ынтымақтастық жөнінде меморандум бекітті.
Құжатқа сейсенбі күні Павлодар қаласында «Астана ЭКСПО-2017» басқарма төрағасы Талғат Ермегияев пен аймақ әкімі Қанат Бозымбаев қол қойды. Бұл туралы «Интерфакс-Қазақстан» агенттігіне ұлттық компанияның баспасөз қызметінен хабарлады.
«ЕХРО нысандарын салуға қажетті өнімдерді жеткізіп беру бизнес өкілдері үшін беріліп отырған тамаша мүмкіндік. Біздің кәсіпорындарымыз көрме нысандарын салуға көмектесуге тиіс және барынша қолұшын бере алады», - деді әкім құжатқа қол қою рәсімінде.
Оның айтуынша, облыс бір жарым мың волонтерді ЕХРО көрмесіне дайындап отыр.
Кездесуде жергілікті өнім өндірушілер мен ЕХРО нысандарын салатын бас мердігерлер ынтымақтастық туралы 9 келісім бекітті.
Атап айтсақ, «Mabco construction s.a.» компаниясы мен қара және түсті металл шығаратын павлодарлық «Кастинг» зауыты; «Базис» ҚК» мен «ҚазБитумСервис» зауыты және жылу изоляция материалдарын шығаратын «МВИ зауыты» ЖШС ынтымақтастық туралы меморандумға қол қойды.
Осындай келісімдер бас мердігер – «АБК Құрылыс-1» компаниясы мен жергілікті кәсіпкерлер – пенополистирол плиталар шығаратын «Стирол» және «Қазэнергокабель» зауыты арасында да бекітілді.
«МагАстана – Транс» компаниясы «ҚазБитумСервис» зауытымен, «ТрестСАЭМ» АҚ «Қазэнергокабель» және металл конструкциялар жасайтын «САЭМ ЗМК» зауытымен келісім бекітті. Ал, «Сембол» құрылыс компаниясы «Ремстрой» ЖШС-мен ЕХРО нысандарына арнап бетон, кабель және тротуарға төселетін тақталар жеткізу туралы меморандумға қол қойды.
Кездесуде Т.Ермегияев Павлодар облысының инфрақұрылымы дамыған мықты өнеркәсіп орталығы екенін атап өтті.
«Мені жергілікті кәсіпорындардың ауқымы мен бірегей өнімі таң қалдырды», деді ол.
«Бүгінгі бекітілген меморандумдар – Павлодарда өндірілген өнімдердің сапасының мойындалғандығының айғағы», - деп қорытты Т.Ермегияев.
Айдарлар мұрағаты
