05.12.2014

Павлодар облысында жемқорлық тәуекелдіктер төлқұжаты әзірленді

Павлодар. 4 желтоқсан. ИНТЕРФАКС-ҚАЗАҚСТАН – Павлодар облысында мемлекеттік сатып алу саласындағы қылмыстардың дер кезінде алдын алу үшін аймақтың арнайы жемқорлық тәуекелдіктер төлқұжаты әзірленді.

Бұл туралы бейсенбі күні сыбайлас жемқорлыққа қарсы күре жөніндегі кеңес барысында мәлімделді. Бұл туралы облыс әкімінің баспасөз қызметі таратқан хабарламада айтылған.

«Төлқұжаттарда барлық әлеуметтік маңызы бар нысандардың пайдалануға беру мерзімі, бюджет қаражатының мөлшері көрсетілуі тиіс», делінген хабарламада.

Кеңес барысында облыстық мемлекеттік қызмет істері және жемқорлыққа қарсы тұру жөніндегі департамент басшысы Денис Шәкенов мәлімдегендей, биыл тоғыз ай ішінде ғана Павлодар облысында 86 жемқорлық қылмыс анықталды, 2013 жылы мұндай қылмыстың 112-сі анықталды.

Жемқорлық әрекеті үшін барлығы 46 адам қылмыстық жауапқа тартылды, оның 36-сы мемлекеттік орган қызметкерлері.

Д.Шәкеновтың айтуынша, жемқорлық ең көп кездесетіні мемлекеттік сатып алу саласы. Онда есепті кезең ішінде 30 қылмыс тіркелді, оның ішінде мемлекеттік бағдарламаларды жүзеге асыру шеңберінде 22 қылмыс орын алған.

«Тәуекелді нысандар санатына белгіленген мерзімде пайдалануға берілмеген, қосымша қаржыландыруды қажет ететін, жобалық қуаттылыққа шықпаған немесе ол бойынша жұмыс әлі басталмаған, ал бюджет қаржысы жымқырылған нысандар жатады. Осы салада жасалған қылмыстар негізінен бюджет қаржысын жымқыруымен, қызметтік бабын теріс пайдаланумен байланысты», - дейді Д.Шәкенов.

Облыс әкімі Қанат Бозымбаев мемлекеттік орган қызметкерлері жасаған кез келген заң бұзушылықтар жалпы мемлекеттік қызмет жүйесінің беделіне кері ықпал ететінін атап көрсетті.

«Жемқорлық тез тамыр жаятындықтан, мемлекет оның тамырын жою үшін тынымсыз, әрі жоспарлы жұмыс жүргізуі тиіс», - дейді Қ.Бозымбаев.

Айдарлар мұрағаты