21.11.2014

Павлодар облысы басқару аппаратын оңтайландырудан үнемделген қаражат есебінен мүмкіндігі шектеулі жандарды арбамен қамтамасыз етті

Астана. 21 қараша. ИНТЕРФАКС-ҚАЗАҚСТАН – Павлодар облысында аймақ билігі басқару аппаратының санын оңтайландыру нәтижесінде үнемделген 63 млн теңгені жарымжандардың мұқтажына жұмсады.

«Жыл басында біз облыстық басқармаларды ірілендіру және облыс аппаратында оңтайландыру есебінен басшылық қызметтерді қысқарттық. Осы орайда басшылардың көлік саны да қысқарды», - деп аймақ әкімі Қанат Бозымбаев бүгін Астанада президент жанындағы Орталық коммуникациялар орталығында баспасөз мәслихатында мәлімдеді.

Әкім осының нәтижесінде үнемделген 63 млн теңге әкімдікке облыстағы мүгедектердің арбаға, есту аппаратына деген мұқтаждығын толық жабуға мүмкіндік бергенін айтады.

Қ.Бозымбаевтың айтуынша, облыста мүмкіндігі шектеулі 29 мыңнан астам адам тұрады. «Біздің жұмысымыздың маңызды бағыты павлодарлықтардың осы санатына әлеуметтік қолдау көрсету» - дейді әкім.

Биыл аймақта бос орындар бойынша 44жәрмеңке өткен, оның ішінде мүмкіндігі шектеулі жандарға арнайы 15 жәрмеңке өткізілген. «Нұр Отан» партиясымен бірше «Кедергісіз келешек» жобасы жүзеге асырылуда.

Әкімнің мәліметі бойынша, 310 кембағал жан тұрақты жұмысқа орналастырылып, 388-і қоғамдық жұмыстарға, 185-і әлеуметтік жұмыс орындарына жіберілген, 41 адам қазір кәсіптік білім алуда.

Айдарлар мұрағаты