21.11.2014

Павлодар облысы билігінің басты жұмыс бағыттарының бірі ауылдарды сумен қамтуды жолға қою болмақ

Астана. 21 қараша. ИНТЕРФАКС-ҚАЗАҚСТАН – Павлодар облысының билігі аймақ ауылдарының сумен қамтылуын 2017 жылға қарай 33,1%-ға дейін жеткізуді көздейді.

«Биылғы жылы 58 елді мекен үшін жобалық құжаттаманы қаржыландыруға облыстық бюджеттен 318 млн теңге бөлінді, оның ішінде пайдалануға беру жұмыстары қайта жанданған Беловодск және Майск тпотық суаққыларға қосылатын 40 ауыл бар», - деп аймақ әкімі Қанат Бозымбаев бүгін президент жанындағы Орталық коммуникациялар қызметінде баспасөз мәслихатында атап көрсетті.

Әкім қазіргі кезде облыстағы үш ауылда суаққы құрылысы жүріп жатқанын мәлімдеді. 2015 жылға 1,5 млрд теңгенің тағы осындай 5 жобасы жоспарланған.

Әкім бүгін түстен кейін Ұлттық экономика министрі Ерболат Досаевпен жүздесіп, аймақтың елді мекендерінде сумен қамтамасыз ету проблемасын шешу үшін қаржы бөлуге қатысты жағдайды талқыламақ. «Келесі жылы біз дәл осы мәселе бойынша көбірек қаржы алу үшін сөйлесу керек. Бұл Павлодар облысындағы ауылдағы жұмыстың басты бағыты болмақ», - дейді Қ.Бозымбаев.

Оның пікірінше, мұның бәрі 2017 жылы ауыз сумен қамтамасыз ету деңгейін 33,1%-ға жеткізуге мүмкіндік береді. "Мұнда бізге күш-жігерімізді еселеуге тура келеді ", - деп атап өтті әкім.

Қ.Бозымбаев Павлодар облысы республикада орталықтандырылған сумен қамтамасыз етуге қол жеткізу тұрғысынан ең төменгі көрсеткішке ие екенін, ауылда ол 19,4%-ды құрайтынын еске салды. Әкімнің айтуынша, соңғы жылдары осы бағыт бойынша жүйелі жұмыс жүргізілмеген. Жерасты суларының барланған қоры жоқтығына байланысты жобалық-сметалық құжаттама әзірлеуге бюджет қаржысы бөлінбеген. ««Ақбұлақ» бағдарламасында, егер құзырлы орган бекіткен жерасты суының барланған қоры болмаса, онда жобалық-сметалық құжаттамаға, суаққы құрылысына ақша бөлінбейді деген шарт бар», - дейді аймақ басшысы.

Айдарлар мұрағаты