30.10.2014

Павлодар облысы ұлттық холдингтермен және даму институттарымен ынтымақтастық жөніндегі меморандум бекітті

Павлодар. 30-қазан. ИНТРФАКС-ҚАЗАҚСТАН – Павлодар облысының әкімдігі бейсенбі күні ашылған халықаралық «Ертіс Инвест 2014» форумында бірқатар ұлттық холдингтермен және даму институттарымен ынтымақтастық меморандумын бекітті. Бұл туралы аймақ басшысының баспасөз қызметі хабарлады.

Атап айтсақ, «Бәйтерек» ұлттық басқару холдингі» АҚ-мен бекітілген меморандум 2020 жылға дейін аймақты дамыту бағдарламасы бойынша тұрғын үй салуға негізделген.

«Қазақстан даму банкі» АҚ-мен бекітілген меморандумда Павлодар облысындағы инфрақұрылымдық жобаларды қаржыландыру көзделген.

«Даму» кәсіпкерлікті қолдау қоры» АҚ-мен бекітілген меморанлумды жүзеге асыру барысында тараптар аймақтағы шағын және орта кәсіпкерлік нысандарын қолдау бойынша ынтымақтастық орнатпақ. Тараптардың әр қайсысы меморандумда көрсетілген мақсаттарға 200 млн теңгеге жуық қаржы бөлу мүмкіндіктерін қарастыруы тиіс.

Облыс әкімдігі «ҚазАгро» ұлттық басқару холдингі» АҚ-мен бірлесіп, қаржыландыруға болатын ауыл шаруашылық өнімдерін өндірушілерінің тізімін анықтайтын үйлестіру кеңесін ұйымдастырады.

Ал, «Kaznex Invest» ұлттық агенттігімен бекітілген меморандум бойынша, аймақ әкімдігі инвестициялық жобаларды іске асыру үшін отандық серіктестер іздестіреді. Агенттік облыстағы кәсіпорындарға инвестициялық жобаларды іске асыруға қатысқысы келетін инвесторлар табуға көмектеспек.

Сонымен қатар, әкімдік РФ Сбербанкінің еншілесімен де меморандум бекітті. Ол бойынша банк болашақта Павлодар облысындағы өнеркәсіп орындарының келешегі зор инвестициялық жобаларын несиелеуді және экспорттаушы кәсіпорындарға қолдау көрсетуді жоспарлап отыр.

Айдарлар мұрағаты