30.10.2014

Шекаралас жатқан Павлодар мен Омбы облысының басшылары Ертісте кеме қатынасын дамыту мәселесін талқылады

Павлодар. 30-қазан. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев пен РФ Омбы облысы үкіметі төрағасының орынбасары-Экономика министрі Александр Третьяков «Ертіс Инвест 2014» халықаралық форумында Ертіс өзенінде кеме қатынасын дамыту мәселесін ортаға салды.

«Ертіс өзенінде кеме қатынасын дамыту – қос аймақ үшін де стратегиялық маңызы бар міндет. Павлодарлық делегацияның Омбы облысына қыркүйек айында жасаған сапарында бұл мәселе ерекше талқыланған болатын. Меморандум бекітіліп, онда кеме қатынасы стратегилық маңызды бағыт ретінде белгіленген-ді. Бүгінгі таңда федералды үкімет бұл мәселеде бізге қолдау көрсетіп отыр», - деді А.Третьяков.

Оның айтуынша, 2015 жылы Ертіс өзенінің табанын тереңдету жобасын жүзеге асыруға кірісу жоспарланып отыр. «Ресейде арктикалық бағдарлама әзірленуіне байланысты Ертіске шығу ерекше қызығушылық тудырып отыр. себебі, өзен арқылы қатынау шығатын шығынды едәуір қысқартады», - деді А.Третьяков.

Өз кезегінде Қ.Бозымбаев облыста Ертіс өзенінің табанын тереңдету жұмыстарының бірнеше жылдан бері жүріп жатқанын алға тартты. «Федералды үкімет бұл мәселеге қолдау көрсетіп отырған болса, бұл жобаның өзен арқылы жүк тасымалдау саласын жандандырып, Омбы облысымен ғана емес, өзен бойында орналасқан өңірлердің бәрімен қарым-қатынасқа жан бітіретінін атап өткім келеді. Біз Ресейден көп нәрсе ала аламыз, РФ бізден алады және өзен арқылы тасымалдау құны арзанға түседі», - деді әкім.

Айдарлар мұрағаты