30.10.2014

Павлодар облысы «Индустриаландыру картасы» шеңберінде 1 трлн теңгеге жуық инвестиция тартпақ

Павлодар. 30-қазан. ИНТЕРФАКС-ҚАЗАҚСТАН – Павлодар облысы мемлекеттік үдемелі индустриалды-инновациялық даму бағдарламасының алғашқы сатысында 1 трлн теңгеге жуық инвестиция тартпақ. Бұл туралы бейсенбі күні халықаралық «Ертіс Инвест-2014» инвестициялық форумында облыс әкімі Қанат Бозымбаев мәлім етті.

«Біз еліміз бойынша еңбекпен қамту деңгейінің 5 пайызын қамтамасыз етіп отырмыз. Ал, Қазақстанның жалпы өнімінің 5 пайызын және өнеркәсіп өнімінің 5 пайызын біздің экономикамыз береді», - дейді әкім.

Аймақ басшысы облыстың инвесторлар үшін тартымды болуының бірнеше себебін алға тартты.

«Біріншіден, облыстың электр энергетикасы саласындағы әлеуеті жоғары, артық қуаттылық пен инфрақұрылым бар. Екіншіден, жалпы республикалық маңызы бар металл және металл емес пайдалы қазбаларға бай. Үшіншіден, Омбы облысының мұнай құбыры арқылы Сібірдің мұнайына шығуға болады. Төртіншіден, біздің облысымызда көмір қоры баршылық. Ол барлық көрсеткіштері жағынан көмір-химия саласын дамытуға лайықты. Сонымен қатар, хлор мен каустик өндірісін дамытуға мүмкіндік беретін дербес минералды-шикізат базасы бар бізде. Бесіншіден, облыстың тасымал әлеуеті және траспорттық инфрақұрылымы жақсы дамыған», - деді әкім.

«Осының бәрі аймақтың Орталық Азия мен Сібірді тоғыстыратын маңызды транспорттық хаб қызметін атқаруға әлеуеті жетеді деуге мүмкіндік береді», - деді ол.

Инвестициялық форумда жұртшылық назарына ұсынылған 124 жобаның 57-сі ғылыми әзірлемелерге негізделген. Соның ішінде, әлеуетті инвесторларға ұсынылатын жобалардың 28-і агроөнеркәсіп кешені, 11-і химия өнеркәсібі, 7-еуі энергетика, 8-і машина жасау, 3-еуі тау-кен кешені, 3-еуі құрылыс индустриясы, тағы үшеуі туризм, 2-еуі мұнай өңдеу, біреуі фармацевтика өнеркәсібіне тиесілі.

Бұл жобаларды жүзеге асыруға 1,7 млрд доллар инвестиция қажет.

Айдарлар мұрағаты