28.10.2014

Павлодарда өтетін халықаралық форумда жалпы құны 1,7 млрд долларлық инвестициялық жобалар таныстырылады

Павлодар. 28-қазан. ИНТЕРФАКС-ҚАЗАҚСТАН – Қарашаның отызы күні Павлодарда өтетін «Ертіс Инвест-2014» инвестициялық форумында жалпы құны 1,7 млрд долларлық 124 жоба жұртшылық назарына ұсынылады.

Облыс басшысы баспасөз қызметінің хабарлауынша, олардың ішінде 57 ғылыми жоба да бар.

Жобалардың басым бөлігі Павлодар облысына тән ауыл шаруашылық және өнеркәсіп өндірісі салаларына тиесілі. Атап айтсақ, химия өнеркәсібі саласында төрт жоба таныстырылмақ. Олар: кальциленген сода зауыты (203 млн доллар инвестиция қажет), кальций гипохлориді өндірісі, фторсутегі қышқылы мен алюминий фториді жобалары.

Сонымен қатар, форумда көмірдің күлін кешенді өңдеп, сапасы жоғары өнеркәсіп өнімдерін алу, автокөліктерге арналған алюминий дискілерін өндіру жобаларының да тұсауы кесіледі.

Ал, ауыл шаруашылық саласына қатысты қос жобаның бірі 24 мың тонналық элеватор құрылысы болса, екіншісі фри жасайтын картоп өңдеу цехын салу жобасы.

Форумға Қазақстанмен ынтымақтастық орнатқан шекаралас аймақтардың өкілдері, елшіліктер мен бизнес қоғамдастықтардың өкілдері, мемлекеттік органдар, даму институттары, ұлттық компаниялар мен ғылыми-зерттеу институттарының қызметкерлері шақырылған.

Айдарлар мұрағаты