14.10.2014

Павлодар облысының әкімі студенттерге аймақтың даму келешегі жайлы әңгімелеп берді

Павлодар. 14-қазан. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев дүйсенбі күні жергілікті төрт жоғарғы оқу орны студенттеріне лекция оқыды. Әкім шәкірттерге аймақтың даму келешегі жайлы әңгімелеп берді.

«Біз қызықты заманда өмір сүріп жатырмыз. Тағдыр жаңа мемлекетті құруға қатысу бақытын әрбір ұрпақтың маңдайына жазбаған. Қазір біз атқарып жатқан істер қалай болғанда да еліміздің тарихына енеді. Біздің істеріміздің бағасын сіздер бересіздер», - деді Қ.Бозымбаев студенттерге, деп хабарлайды әкімнің баспасөз қызметі.

Әкім тәуелсіздік жылдары облыстың аймақтық жалпы өнімі 43 есе (41,2 млрд теңгеден 1,8 трлн теңгеге жетті), ал жан басына шаққанда – 53 есе (44,2 мың теңгеден 2,4 млн теңгеге жетті) артқанын атап өтті.

Соңғы кезде аймақтық жалпы өнімнің өсу қарқыны бәсеңдеп қалғанын айта кету керек. Біз даму траекториясына шығу үшін нақты стратегиялық жоспар құруымыз керек. Оны 2025 жылға дейін әзірлейміз, дейді аймақ басшысы.

Оның айтуынша, стратегияның басты бағыттарының бірі – индустриалды-инновациялық даму.

«Химия және мұнай-химия өнеркәсібін ескере отырып, аймақта «Павлодар» ЕЭА құрылды. Онда ассортименті мол өнімдер өндіретін зауыттар салу көзделіп отыр. Кейбірінің ТМД аумағында баламасы жоқ», - деді Қ.Бозымбаев. Мәселен, мұнай-химия кластерінде өңделгеннен кейін тоннасы 500 долларлық мұнайдан алынған ақырғы өнімнің құны 2-5 мың долларға жетеді. Одан түйіршіктелген полипропилен, ыдыс-қап, пластик ыдыс т.б. алынады.

«Субаймақ шеңберінде алюминий жайма мен сымдар, автокөлік дөңгелегіне арналған алюминий дискілер, алюминий катанкалар мен алюминий шыбықтарөндірісі ұйымдастырылады. Кәсіпкерлер тоннасы 2 мың долларлық алюминийден алынған ақырғы өнімді 4 мың долларға сата алады», - деді әкім.

Шағын және орта бизнесті дамыту мәселесіне келгенде Қ.Бозымбаев «өңірде салынып жатқан технопарк шағын бизнесті дамытуға мүмкіндік беретін негізгі құрал» екенін атап өтті.

«Өзен көлігі саласын дамыту мәселесіне жеке тоқталғым келеді. әзірге бұл сала дұрыс бағаланбай отыр. Қазіргі таңда, кемелердің габариті мен тиісті тереңдіктің болмауынан Ертіс өзені арқылы, әсіресе, Қазақстан мен Ресейдің шекаралас аймақтары арасында жүк тасымалы дамымай отыр. Бірақ болашақта бұл жағдай реттеледі», - деді әкім.

Аймақ басшысы әлеуметтік бағдарламаларды дамыту жайын да назардан тыс қалдырған жоқ.

Лекция соңында Қ.Бозымбаев студенттерге былай деді: «Жас болсаңдар да әрқайсыңның жеке бостандығың бар, күн сайын түрленген өркениеттің ырғағын сезіне білесіңдер. Тұлға болу дегініміз ағыспен жүзбей, белсенді, жауапты азамат болу деген сөз».

Айдарлар мұрағаты