06.10.2014

Ақсу ферроқорытпа зауыты 2015-2016 жылдары экологиялық бағдарламаларды жүзеге асыруға 6 млрд теңге жұмсамақ

Павлодар. 6-қазан. ИНТЕРФАКС-ҚАЗАҚСТАН – Ақсу ферроқорытпа зауыты алдағы екі жылды экологиялық бағдарламаларды жүзеге асыруға 6 млрд теңге жұмсайды, деп хабарлйды компанияның баспасөз қызметі.

Негізгі жобалардың арасында №4 балқыту цехындағы газ тазарту кешенін жаңарту жобасы бар. 2015 жылы №45 және №46 пештердегі газ тазарту қондырғылары салынып бітуі тиіс. Келесі жылы аталған цехтағы тағы үш пештің газ тазарту қондырғылары қайта қалпына келтірілмек.

Жаңа нысандар іске қосылғаннан кейін ауаға тасталатын шаң-тозаңды қалдықтардың көлемі жыл сайын 240 тоннаға қысқарып отырады.

Табиғатты қорғау бьағдарламасындағы басым бағыттардың бірі - өндіріс қалдықтарын қайта өңдеу. Мәселен, 2015 жылы 940 мың тонна жоғары көміртекті феррохром қалдығын өңдеу көзделіп отыр. Яғни, кәсіпорыннан шығатын қалдық түгел дерлік өңделеді деген сөз. 1996 жылы дәл осы мақсатта салынған қалдықтарды өңдеу цехы шлакты ұсақтап, одан металл, металл қоспасы мен қиыршық тас алады.

Сонымен қатар, кәсіпорында ферроқорытпа газын өндірістік процестерге пайдалану бағдарламасы әлі де жүзеге асырылып жатыр. «Феррорқорытпа газы агломерат шығару үшін қолданылады. Сонымен қатар, зауыт қазандықтарында қосымша отын ретінде пайдаланылуда. Бұл жоба іске қосылғаннан кейін қазандық тұтынатын көмір көлемі 22 мың тоннаға, мазут 420 тоннаға қысқарды», - делінген хабарламада.

Жалпы, Ақсу ферроқорытпа зауытының екі жылға арналған табиғатты қорғау бағдарламасы 40 баптан тұрады. Олар жер ресурстарын, флора мен фаунаны, су жағалаулары мен экологиялық су жүйелерін қорғау, радиациялық, биологиялық және химиялық қауіпсіздігін қамтамасыз ету мәселелеріне арналған. 

Айдарлар мұрағаты