30.09.2014

Павлодар мен Омбы облыстары ынтымақтастық орнату ниеті туралы хаттамаға қол қойды

Павлодар. 30-қыркүйек. ИНТЕРФАКС-ҚАЗАҚСТАН – Павлодар облысы әкімдігі мен РФ Омбы облысының үкіметі экономикалық, әлеуметтік және транспорт сынды тағы басқа салаларда ынтымақтастық орнату ниеті туралы хаттама бекітті.

Облыс әкімдігі баспасөз қызметінің хабарлауынша, құжатқа сейсенбі күні Атырауда Қазақстан мен Ресейдің XI Аймақ аралық ынтымақтастық форумында қол қойылды.

Тараптар көлік-тасымал дәліздерін қолдай отырып, Ертіс өзенінде кеме қатынасын дамытуды, кәсіпкерлік нысандар арасындағы іскерлік байланыстарды нығайтуды көздеп отыр, делінген хабарламада.

Сонымен қатар, Павлодар облысы әкімдігі мен Омбы облысының үкіметі ауыл шаруашылық өнімдерін өңдеу мен сақтауға арналған өндіріс ошақтарын, құрылыс материалдарын шығыратын өндіріс нысандарын дамытып, инвециялық жобаларды бірлесіп жүзеге асырмақ.

«Біз ресейлік әріптестерімізбен экономика, көлік, әлеуметтік және гуманитарлық салаларда ынтымақтастық орнатамыз. Оған қоса, бұған дейінгі келісімдердің орындалу деңгейіне талдау жасаймыз. Біз Омбы облысымен тығыз байланыста жұмыс істеп жатырмыз және болашақта осы бағыттағы жұмысты нығайта түсеміз», - дейді Павлодар облысының әкімі Қанат Бозымбаев.

2013 жылы облыстың Ресей аймақтарымен арадағы сыртқы сауда айналымы 2,8 млрд долларды құрады.

Айдарлар мұрағаты