19.09.2014
Павлодар. 19 қыркүйек. ИНТЕРФАКС-ҚАЗАҚСТАН – Павлодарда жұма күні кеңес кезінде қуғынға ұшыраған жазушы, публицист Жүсіпбек Аймауытовқа арнап ескерткіш ашылды.
Ескерткіш жазушы атындағы Павлодар облыстық қазақ музыкалық-драма театры маңында орналасқан. Бұл туралы «Интерфакс-Қазақстан» агенттігіне облыстық мәдениет басқармасы мәлімдеді.
«Мүсіндік композицияның биіктігі 3,5 метр, ал тұғырымен бірге 7,6 метрді құрайды. Жазушының кескіні қоладан, ал тұғыры тегістелген қою қызыл гранит тастан жасалған. Ескерткіш авторы елордалық мүсінші Ермек Тоқтаров», - дейді мәдениет басқармасы.
Ескерткіш демеушілердің қаржысына дайындалған.
Таяуда павлодарлық делегация Мәскеуге барып қайтты. Онда Ваганьков зиратындағы қуғынға ұшырап, 1931 жылы атылған Ж.Аймауытов жерленген жерге барды.
Жазушы зиратынан әкелінген топырақ салынған капсула Павлодардағы ескерткіштің қасына қойылды.