09.09.2014

Павлодар облысының әкімі тұрғын үйді салу мерзімін қысқарту үшін типтік жобаларды пайдалануды ұсынды

Павлодар. 9-қыркүйек. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев тұрғын үйлерді салу мерзімін қысқарту үшін қолданыстағы типтік жобаларды пайдалануды ұсынды.

«Бүгінде облыста бес, алты, тоғыз қабатты үйлердің жап-жақсы жобалары бар. Сонымен қатар, 24 пәтерлі үйдің де жобасы дайын тұр. Жаңа нысандарды жобалау барысында соларды қайтадан пайдаланғанымыз жөн емес пе? Бұл баспана салу мерзімін едәуір қысқартуға мүмкіндік берер еді. Ал, біз жобалаушы компаниялардың «жемтігіне» айналып отырмыз», - деді Қ.Бозымбаев сейсенбі күні әкім аппаратында өткен кеңесте.

Аймақ басшысы құрылыс басқармасы, жолаушылар көлігі және автомобиль жолдары басқармасы басшыларына осы мәселе бойынша бірыңғай жүйе қалыптастыруды тапсырды.

«Біз эконом класқа арналған «Қолжетімді баспана» бағдарламасы бойыншаүй салып жатырмыз ғой. Бұл жерде бірдеңе ойлап табу мүмкін емес», - деді ол.

Сонымен қатар, Қ.Бозымбаев жұмысты дұрыс жасамаған жобалаушыларға талапты күшейтуге кеңес берді.

«Бір рет айыппұл салыңыздар. Келесі жолы лицензиядан айыру керек. Бізге олқылығы көп жұмыстың қажеті жоқ. Халыққа барлық жағдайы жасалған үйлер салып беруіміз керек. Яғни, үйде жарық, жылу, су мен лифт болуы тиіс деген сөз», - деп қосты әкім.

Биылғы жылы облыста «Қолжетімді баспана» бағдарламасы негізінде 113,22 мың шаршы метрлік 19 көп қабатты тұрғын үй мен 55 мың шаршы метрлік жеке үй салынуы тиіс.

Айдарлар мұрағаты