09.09.2014

Павлодар облысында жоба құны 2,2 млрд теңгені құрайтын кірпіш шығаратын зауыт іске қосылды

Павлодар. 9 қыркүйек. ИНТЕРФАКС-ҚАЗАҚСТАН - "Вершина" ЖШС Екібастұзда жоба құны 2,2 млрд теңгені құрайтын кірпіш зауытын іске қосты. Бұл туралы облыс әкімінің баспасөз қызметі мәлімдеді.

Зауыттың ашылуына Павлодар облысының әкімі Қанат Бозымбаев қатысты. Жобалық қуаттылыққа шығу кезінде зауыттың өнімділігі жылына құрылысқа арналған 36 млн дана кірпішті құрайды.

110 жұмыс орны құрылған, зауыт толық қуаттылыққа көшкен соң жұмысшылар саны 140 адамға жетпек.

Жоба шағын қалаларды дамыту және «Бизнестің жол картасы-2020" бағдарламалары шеңберінде жүзеге асырылған.

«Вершина» ЖШС кірпіш өндіруде шикізат ретінде көмір кенішінен шыққан топырақты пайдаланады. Заң бойынша бұл топырақтар жекеменшікке жатады, кәсіпорын басшылығы кен орнына кіру режімі күрделі болғандықтан облыс әкіміне жүгініп, топырақ қалдықтарына еркін кіру мүмкіндігін қарастыру жөнінде өтініш білдірді. Аймақ басшысы Қ.Бозымбаев облыс әкімінің бірінші орынбасарына бұл мәселені шешуде бірлесіп әрекет ету тетігін қарастыруды тапсырды.

Айдарлар мұрағаты