02.09.2014

Павлодар облысының билігі ақылы қызмет құнын бір қалыпта ұстап тұрмақ

Павлодар. 2-қыркүйек. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев әкімдік аппаратында өткен бүгінгі жиында ақылы қызмет құнын бір қалыпта ұстап тұру туралы мәселе көтерді.

«Мен осыдан жарты жыл бұрын ақылы қызмет саласындағы қымбатшылықты тоқтатыңдар деген болатынмын. Бірақ бұл мәселе уыстан шығып кетті. Дегенмен, тұтыну бағасының индексі жоғары болғандықтан ақылы қызмет саласындағы қымбатшылықты тоқтату қажет», - деді Қ.Бозымбаев аппараттың сейсенбідегі жиынында.

Жиында айтылғандай, облыс бойынша азық-түлік тауарларының индексі республикалық деңгейден біршама төмен. Ал, ақылы қызмет тарифі жағынан Павлордар ең қымбат қала болып тұр. Өңірде коммуналдық тариф, денсаулық сақтау және білім бағасы орташа республикалық деңгейден біршама жоғары. 

Аймақта тіс дәрігерлерінің қызметі орта есеппен 25 пайызға дейін қымбаттаған көрінеді.

«Ендеше, Павлодарда стоматология саласында бәсеке жоқ деген сөз. Осы саланы дамытамыз, «жол картасын» жасаймыз», - деді аймақ басшысы.

Жалпы аймақта баға тұрақты. Бөлшек сауда саласында жүргізілген сараптама нәтижесіне сүйенсек, Павлодарда 1-сұрыпты ұн, сиыр еті, зарарсыздандырылған сүт, айран, кеспе, күнбағыс майы, сұлы, арпа, қарақұмық пен бидай жармасының бағасы әлдеқайда төмен. Ал, құс етінің бағасы шарықтап тұр.

Кәсіпкерлік, сауда және туризм басқармасы бастығы Александр Бабенконың айтуынша, бұл маусым-шілде айларында Литваның Клайпеда қаласындағы қоймалардың жабылуына байланысты болып отырған көрінеді.

«Қазір бәрі дұрысталды, тапшылық байқалмайды, баға төмендеуі тиіс», - деді А.Бабенко.

Өз кезегінде Қ.Бозымбаев «әкімдердің міндеті – халықты азық-түлікпен және әлеуметтік маңызы бар тауарлармен, жанар-жағармаймен, дәрі-дәрмекпен қамтамасыз ету және тапшылыққа жол бермеу» екендігін қадап айтты.

Сонымен қатар, әкім жауапты тұлғаларға жыл соңына дейін нанның қымбаттауына жол бермеуді тапсырды. Ал, «егер елімізде ұн бағасы қымбаттап жатса оны жергілікті бюджет есебінен арзандату жолдарын қарастыру қажет», деді Қ.Бозымбаев.

Айдарлар мұрағаты