02.09.2014

Павлодар облысының әкімі мектептерді жаңа оқу жылына дұрыс дайындамаған шенеуніктерді жазаламақ

Павлодар. 2-қыркүйек. ИНТЕРФАКС-ҚАЗАҚСТАН – Павлодар облысының әкімі шенеуніктерді мектептерді жаңа оқу жылына тиісінше дайындалмағаны үшін жазаламақ.

«Мен қалалар мен аудандардың әкімдеріне 1-қыркүйекте жаңа оқу жылына сақадай сай болуды тапсырған болатынмын. Облыс әкімі аппараты жүргізген тексеру нәтижесіне сүйенсек, Павлодар ауданындағы Ефремов орта мектебі оқу жылына дайын болмай шықты», - деді Қ.Бозымбаев сейсенбі күні әкімдіктегі жиында.

Аймақ басшысының айтуынша, Ефремов мектебінде шағын орталықты жөндеу жұмыстары аяқталмаған, ескі терезелер кей жерлерде ауыстырылмаған және мектеп аумағы абаттандырылмапты.

Ал, Ақтоғай ауданындағы Қожамжар ауылдық мектебінде терезе, шатыр, ғимарат маңдайын әрлеу және абаттандыру жұмыстары әлі күнге аяқталмаған көрінеді.

Осыған орай, Қ.Бозымбаев әкімдік аппаратына «аталған аудандардың әкімдері мен жауапты тұлғаларды тәртіптік жазаға тарту туралы ұсыныс енгізуді» тапсырды.

Айдарлар мұрағаты