25.08.2014

Павлодар облысының әкімі жергілікті бизнес пен билік орындарын сынға алды

Павлодар. 25-тамыз. ИНТЕРФАКС-ҚАЗАҚСТАН – Павлодар облысында мектепке дейінгі білім беретін мекемелерге деген сұраныс жыл сайын артып келеді, деп мәлімдеді аймақ басшысы Қанат Бозымбаев.

«Бұл мәселе, әсіресе қалаларда тым өткір. Біз Тереңкөл ауылында мектеп жанындағы интернаттан 90 орындық бала-бақша жасауға 66 млн теңге, Баянауыл ауылындағы бала-бақша ғимаратын күрделі жөндеуден өткізуге 40 млн теңге, «ҚазТрансОйл» компаниясының көмегімен Павлодар қаласында 320 орындық бала-бақша салуға 100 млн теңге таптық», - деді әкім дүйсенбі күні облыс мұғалімдерінің конференциясында.

Сонымен қатар, ERG Kazakhstan жеке меншік компаниясының көмегімен Павлодар мен Мойылды ауылында екі бала-бақша ғимаратын сатып алу жоспарланып отыр, деді ол.

Аймақ басшысы жеке инвесторлар мен жергілікті биліктің әлеуметтік белсенділігінің төмендігін қатаң сынға алды.

«Мемлекет-жеке меншік әріптестігін дамытуда жеке бизнестің де, жергілікті билік орындарының да белсенділік танытпайтынын айтпай кетуге болмайды», - деді Қ.Бозымбаев.

Конференция барысында әкім қалалар мен аудан әкімдеріне 2015 жылы кем дегенде бір, ал қалаларда кем дегенде үш мемлекеттік емес бала-бақша ашуды тапсырды.

Айдарлар мұрағаты