Жаңартылды: 17.08.2018, 17:34 (АСТ)

АЗИАДА КЕЗІНДЕ ҚАЛАНЫҢ БАРЛЫҚ БАЗАРЛАРЫ ӘДЕТТЕГІ РЕЖІМДЕ ЖҰМЫС ІСТЕЙТІН БОЛАДЫ


VII қысқы Азиада ойындарын өткізу кезінде жергілікті тұрғындарды спорттық шаралармен қатар Алматы өмірінің қалай өзгеретіні туралы сұрақ та мазалайтыны сөзсіз. Алматы әкімінің орынбасары Серік СЕЙДУМАНОВ Азиаданың өткізілуі мен қабылданатын қауіпсіздік шаралары қонақүйлер мен базарлардың жұмысына, оқу үрдісі мен қала қозғалысына қалай әсер ететіні туралы "Интерфакс-Қазақстан" агенттігімен ой бөлісті

- Серік Тұрарұлы, Азиадаға дейін бірнеше ай ғана қалды. Алматыда Ойынды өткізу кезінде қандай қауіпсіздік шаралары қабылданады?

- Қауіпсіздік - Азиада өткізудегі басты мәселе. Мәселен, осы қауіпсіздіктің көзге көрінерлік бөлігі әуежайдан басталып, жарыстар өтетін және жарысқа қатысушылар тұратын жерлерде жалғаспақ. Ал көрінбейтін бөлігі, қалада Ойынға қатысушыларға және Азиада өткізуге кері әсер етуі мүмкін ықтималдықтардың алдын алу жөнінде арнайы шаралар өткізуде жатыр.

Ойынның қауіпсіздігін қамтамасыз етудің көрінетін бөлігін тәртіп сақшылары, еріктілер мен Азиада ойындарының дирекциясы атқарады. Әрине, қауіпсіздікті қамтамасыз етуге спорттық нысандар мен Азиада қонақтары мен қатысушылары орналасатын орындардың қызметкерлері де қатысады. Көрінетін бөлік бейнекамералардың орналастырылуын да қамтиды.

Айтпақшы, желтоқсан айында қауіпсіздікті қамтамасыз ету жөнінде арнайы кеңес өтпек.

- Қауіпсіздікті қамтамасыз ету шеңберінде қала базарларының жұмысына шектеу қойылады ма?

- Бұл уақытта сауда нүктелерінің, қоғамдық тамақтану орындарының жұмысына ешқандай шектеулер қойылмайды. Мәселен, "Көк базар", "барахолка" секілді базарлар әдеттегі режіммен жұмыс істей береді.

- Қоғамдық көлік қозғалысының бағыты өзгертіле ме? Жаңадан көлік бағыттары енгізіле ме?

- Қоғамдық транспорт бағыттары өзгермейді. Спортшылар мен Ойынға қатысушыларға арнап қосымша бағыттар енгізіледі. Бұл бағыттарды Алматы қаласының тұрғындары да қолдана алады, бірақ ең алдымен, олар Азиадаға қатысушылар мен қонақтарға арналмақ.

Әзірге, "Табаған" тау шаңғысы курорты және шаңғы-биатлон стадионымен байланысты екі бағыт енгізу туралы сөз болып отыр, өйткені бұл нысандар қала сыртында орналасқан. Қала ішінде "Қазақстан" қонақүйінен Медеуге және "Шымбұлақ" тау шаңғы курортына дейін арнайы бағыттар енгізіледі.

27-28 желтоқсан күндері соңғы сынақ жарыстардан кейін қоғамдық көлікке қаншалықты қажеттілік барын көреміз және Орталық стадионнан Медеу мен Шымбұлаққа дейін арнайы бағыттар енгізуіміз мүмкін.

Ең алдымен, арнайы автобустар Азиада қонақтары мен қатысушыларына арналатынын атап өткім келеді, дегенмен қажеттілігіне қарай Алматы қаласының тұрғындары үшін де автобустар енгіземіз.

- Қала мектептері мен жоғары оқу орындарында оқу үрдісі қалай жүргізілмек?

- Мектептер мен жоғары оқу орындарында оқу үрдісі әдеттегідей қалыпты режімде жүргізіледі. Қауіпсіздік жөніндегі кеңесте арнайы кеңес өткізіп, оқу орындарының ұжымдарынан қандай ұсыныстар түсетінін қараймыз. Біз бұл спорттық жарыстар апталығында жоғары сынып оқушылары мен жоғары оқу орындарының студенттері спорттық шараларға бару мүмкіндігіне ие болғанын қалаймыз.

- Азиада өткізу кезінде ұсақ қонақүйлер жабылып қалмай ма?

- Қаламызда қонақтарды күтетін қонақүйлер жеткілікті екенін айтқым келеді. Әзірге біз жалпы 23 қонақүйді тартқалы отырмыз, шағын қонайқүйлерді қосқанда, қала сыртындағысы бар, бәрінің саны жүзге жуық. Қонақүйлердің жұмысына ешқандай шектеулер қойылмайды, алайда Азиада кезінде санитарлық-эпидемиологиялық қызмет, өрт қызметі, құқықтық тәртіп қызметі олардың жұмысын мұқият бақылайтын болады.

- Қалаға шеттен көліктердің кіруіне шектеу қою туралы шешім қабылдана ма?

- Бүгінгі таңда құқық қорғау органдары тарапынан қалаға шеттен көліктердің кіруіне шектеу қою жөнінде ешқандай ұсыныс келіп түспеді. Егер мұндай ұсыныс болып жатса, ұйымдастыру комитетінің штабы оны қосымша қарастырады. Бірақ ұйымдастыру комитетінің ұстанымы - кіруге шектеу қоймау.

- Вокзалдарда, әуежайда қандай нақты қауіпсіздік шаралары қабылданбақ?

- Азиада ойындары кезінде құқықтық тәртіп қызметі өздерінің қызметтік міндеттеріне сәйкес қатаң режімде жұмыс істеуге көшетінін ашық айта аламын. Қалғаны олардың өз құзырында.

- Тұрақты тұратын жері жоқ адамдарға қатысты қандай да бір шаралар қабылдана ма?

- Міндетті түрде. Азиада кезінде рейд жүргізіліп, тұрғылықты жері жоқ тұлғалар арнайы мекемелерге орналастырылады. Біз Азиада кезінде Алматы қалалық әлеуметтік бейімдеу орталығының күшейтілген режімде жұмыс істеуі үшін шаралар қабылдаймыз. Тұрақты тұратын жері жоқ жандар осы орталыққа орналастырылып, тамақ беріледі, қажетті күтім жасалып, сол жерде тұра алады.

- Жақында Алматыдағы Азиада ойыны дирекциясының жаңа басшысын тағайындады. Оның жұмысына қандай баға бересіз?

- Оның жұмысына бағаны Азиада қорытындысы бойынша беремін, өйткені бізде күнделікті баға жоқ. Ол күнделікті өз қызметтік міндетін орындауы тиіс.


БІЗДІҢ АНЫҚТАМА:
Қараша айының басында Азиаданың алматылық дирекциясының жаңа басшысы болып Сұлтанбек Сыздықов тағайындалды. Дирекцияның бұрынғы басшысы Сұлтанмахмұт Шоқпытов қызметінен шеттетіліп, жұмысындағы олқылықтар үшін алматылық дирекция бөлімдерінің бірінің меңгерушісі қызметіне төмендетілді. Атап айтқанда, "Мәдени Азиада" жобасын жүзеге асыруға байланысты бірқатар шағымдар болды.

- Сіз бірқатар ескертулер айтқан "Мәдени Азиада" жобасы қалай жүзеге асырылуда?

- "Мәдени Азиада" жобасының мазмұнды бөлігін жүзеге асыру Алматы қалалық мәдени басқармасына өткізіп берілді.

Сонымен қатар, жоспарланған алты бағдарламаның орнына енді сегіз бағдарлама болмақ. Сегіз бағыт бойынша жұмыс жүргізілуде.

Егер жаңа екі бағдарлама бойынша бізде сұрақ жоқ болса, қалған алтауы бойынша қиындықтар бар, бірақ оларды екі апта ішінде жоятынымыз сөзсіз. Бұлар тұжырымдық, мазмұндық сипаттағы қиындықтар.

"Мәдени Азиада" жобасына қосылған жаңа бағдарламалардың біреуі - "Астана" алаңында өтетін керемет жарықшоу. Қазір бар айтатыным, мұндайды Алматыда әлі көрген емеспін.

- Сұхбатыңызға рахмет!


Қараша, 2010 жыл
(C) 2009, "Интерфакс-Қазақстан" агенттігі.
Пайдаланғанда сілтеме жасау міндетті.



Қараша, 2010
© 2018 "Интерфакс-Қазақстан" агенттігі
Пайдаланғанда сілтеме жасау міндетті


Айдарлар мұрағаты

Баспасөз орталығы



Error message here!

Show Error message here!

Close