01.04.2016

Түріктің Pensan A.S. және Avrupa Peyzaj Ltd компаниялары Павлодар облысына 25 млн долларға жуық инвестиция салмақ

Павлодар. 1 сәуір. ИНТЕРФАКС-ҚАЗАҚСТАН – Түріктің Pensan A.S. және Avrupa Peyzaj Ltd компаниялары өз бизнесін жартылай көшіру арқылы Павлодар облысына 25 млн долларға жуық инвестиция салуды жоспарлап отыр. бұл туралы Kaznex Invest Экспорт және инвестициялар жөніндегі ұлттық агенттіктің басқарушы директоры Нұриддин Аманқұл мәлімдеді.

«Бүгінде Павлодар облысына түріктің қос компаниясы қызығушылық танытып отыр. Олардың бірі – қалам мен қарындаш шығаратын Pensan A.S., екіншісі балаларға арналған спорт және ойын алаңдарын жасапйтын Avrupa Peyzaj Ltd компаниясы», - деді ол журналистерге аталған компаниялар өкілдерімен кездесуден кейін.

Айтуынша, аймақ түрік кәсіпкерлерін Ресей рыногына жақындығымен және Моңғолияға шығу мүмкіндігімен, электр қуаты мен жұмыс күшінің арзандығымен қызықтырып отырған көрінеді.

«Біз түрік компанияларымен экономиканың барлық саласында ынтымақтастық орнатуға мүдделіміз. Облысқа шетелден тікелей инвестиция көптеп келіп жатыр. Бұл іскерлік топтардың аймаққа деген сенімінің белгісі болса керек. Сонымен қатар, біздің өңірде түрік компаниялары табысты еңбек етіп жатыр, бірқатар бірлескен кәсіпорындар да бар», деді Павлодар облысының әкімі Болат Бақауов шетелдік инвесторлармен кездесуде.

Түркиялық бизнесмендер өңірдегі бірқатар кәсіпорындарға, соның ішінде химия және металлургия саласындағы өндіріс ошақтарына қызығушылық танытқанын жасырмады.

Павлодар облысы Түркияға полипропилен жеткізеді. 2015 жылы аймақ 3 млн доллардың өнімін жеткізген (2014 жылы – 5,5 млн$).

Айдарлар мұрағаты