23.04.2015

Павлодар облысының ардагерлеріне Жеңіс күні құрметіне 250 мың теңгеден материалдық көмек беріледі

Павлодар. 23 сәуір. ИНТЕРФАКС-ҚАЗАҚСТАН – Жеңістің 70 жылдығы қарсаңында Павлодар облысында Ұлы Отан соғысы ардагерлері мен тыл еңбеккерлеріне ерекше құрмет көрсетіліп жатыр.

«Жеңіс мерекесі қарсаңында Ұлы Отан соғысы ардагерлерінің есеп-шоттарына республикалық және жіргілікті бюджеттер есебінен 250 мың теңгеден (100 мың теңге – республикалық бюджеттен, 150 мың теңге – жергілікті бюджеттен) материалдық көмек аударылады. Бұл туралы бейсенбі күні облыс әкімдігінің баспасөз қызметі хабарлады.

Хабарламаға сүйенсек, соғысқа қатысушыларға теңестірілген тұлғалар мен соғыс мүгедектеріне қолдау көрсету мақсатында жергілікті бюджеттен 19820 теңге, соғыс жылдарында тылда кем дегенде 6 ай жұмыс істеген еңбеккерлерге 9910 теңгеден бөлініп отыр.

Баспасөз қызметінің хабарлауынша, республикалық бюджеттен ҰОС қатысушыларына теңестірілген тұлғаларға 25 мыңнан 70 мың теңгеге дейін, тыл еңбеккерлеріне және ҰОС жылдарындағы ерен еңбегі үшін медальдармен марапатталған азаматтар мен кем дегенде 6 ай тылда жұмыс істеген еңбеккерлерге 25 мың теңгеден материалдық көмек беріледі.

Облыста наурыздың 20-сы мен сәуірдің 20-сы аралығында өтетін дәстүрлі қайырымдылық айы биылғы жылы «Жеңіс» деген атаумен өткізілді.

Айлық шара барысында облыстағы кәсіпорындар 91,6 млн теңгенің қайырымдылық көмегін көрсетті. Соның ішінде ҰОС ардагерлеріне, оларға теңестірілген тұлғалар мен тыл еңбеккерлеріне 18 млн теңгеге азық-түлік, бағалы сыйлық пен түрлі қызметтер түрінде көмек көрсетілді.

Сонымен қатар, «Өмір желісі» жобасы шеңберінде Павлодар облысында тұратын Ұлы Отан соғысы ардагерлеріне «дабыл тетігі» функциясы бар ұялы телефондар табыс етілді.

Биылғы жылы павлодарлық 16 ардагер Астанада өтетін Жеңіс парадына, бір ардагер Мәскеуде өтетін парадқа қатысады.

Баспасөз қызметінің мәліметіне қарағанда, бүгінде Павлодар облысы аумағында Ұлы Отан соғысына қатысқан 246 ардагер тұрады. Оның ішінде ҰОС-ның 47 мүгедегі, ҰОС қатысушыларына теңестірілген 1333 тұлға, еңбек медалімен марапатталған 649 тыл еңбеккері, сондай-ақ, соғыс жылдарында тылда кем дегенде 6 ай еңбек еткен 8586 адам бар. Жалпы саны 10165 адам.

Айдарлар мұрағаты