10.07.2014
Павлодар облысы мен Алтай өлкесінің ынтымақтастығы шеңберінде 580 млн теңгенің келісімшарттары бекітілді
Павлодар. 9 шілде. ИНТЕРФАКС-ҚАЗАҚСТАН – Аймақ әкімі Қанат Бозымбаев басқарған Павлодар облысы делегациясының Алтай өлкесіне сапары барысында 580 млн теңге жалпы соманы құрайтын құжаттарға қол қойылды.
Шекаралық ынтымақтастықты дамыту және нығайту жөніндегі келіссөздер үшін Барнауылға сапар сәрсенбі күні өтті, деп облыс әкімінің баспасөз қызметі мәлімдеді.
Кездесу аясында Павлодар облысының әкімі мен Алтай өлкесінің губернаторы өнеркісіп пен ауыл шаруашылығы, денсаулық сақтау және гуманитарлық даму саласындағы мәселелерді, сондай-ақ қоршаған ортаны қорғау, инвестициялық ынтымақтастық мүмкіндігі мәселелерін талқылады, делінген баспасөз қызметінің хабарламасында.
Сапар барысында Алтай өлкесі әкімшілігі мен Павлодар облысы әкімдігі арасындағы келісімді жүзеге асыру бойынша 2014-2015 жылдарға арналған іс-шаралар жоспарына қол қойылды.
Мұнымен қоса, өзге құжаттарға қол қойылған. Мәселен, «Қазэнергокабель» АҚ және «Аллеон» ТД» ААҚ арасында 300 млн теңгеге алюминий сым жеткізуге, «Стальмонтаж» ЖШС, «Алтайталь» ЖШС арасында 25 млн теңгеге жүк көтергіш сатып алуға, «Галицкое» ЖШС пен «Анитим» компаниясы арасында 4,5 млн теңгеге топырақ өңдеуге арналған ауылшаруашылық техникасын сатып алуға, «Жеңіс» ЖШС пен «Киров атындағы ПЗ колхоз» ӘКК арасында 35 млн теңгеге ірі қара малдың асыл төлін сатып алуға арналған келісімшарттар бекітілді.
Алтай өлкесіне сапар шеңберінде 580 млн теңгеге бес меморандум, екі келісім және бірқатар келісімшарттарға қол қойылды.
Павлодар облысы мен Алтай өлкесінде шекаралық ынтымақтастық 2012 жылы екі аймақ арасында бекітілген сауда-экономикалық, ғылыми-техникалық және мәдени ынтымақтастық туралы келісім шеңберінде жүзеге асырылады.
Алтай өлкесімен сауда-экономикалық ынтымақтастық түрлі салаларда дамиды. Мәселен, Павлодар облысы қоңыр көмір, қара металдан жасалған бұйымдар экспорттайды. Алтай жағынан кокс пен жартылай кокс, ағаш материалдары, темір жол шпалдары және басқа өнімдер, қондырғы, пневматикалық резеңке шиналар жеткізіледі.
Ауылшаруашылық саласында аймақтар асыл тұқымды мал шаруашылығы мен өнеркәсіптік бау-бақша саласында ынтымақтастық жүргізеді.
Ресейлік көршілермен сыртқы экономикалық қызметке қатысушылар Ақсу темір қорытпа зауыты, «Богатырь Көмір» ЖШС, «Қазақстан алюминиі» АҚ, «ЕЭК» АҚ, «АЕS Майкүбен» ЖШС, «Қазэнергокабель» АҚ, «Рубиком» ЖШС, «Павлодартұз» ЖШС болып табылады.
Павлодар облысы мен Алтай өлкесінің шекара қашықтығы 199,8 км құрайды.
Айдарлар мұрағаты
