20.06.2014

Павлодар облысының әкімі Ресейде аймақтың сауда өкілдігін ашу туралы ұсыныс білдірді

      Павлодар. 20 маусым. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев аймақтың экспорттық әлеуетін дамыту үшін Ресеймен шекаралас облыстардың бірінде сауда өкілдігін ашуды ұсынуда.
    «Өкінішке орай, шағын және орта бизнес өнімдерін экспорттау әзірге дамымаған және жылына 22 млн АҚШ долларынан, немесе ішкі аймақтық өнімнің 0,21% аспайды. Павлодар облысы Ресейдің 10 млн астам жалпы тұрғыны бар Новосибирск, Омск, Томск облыстары, Краснояр өлкесімен шектеседі», - деп әкім Павлодарда Ұлттық кәсіпкерлер палатасы аймақтық кеңес мүшелерімен аймақтағы бизнес ахуалды әрі қарай жақсарту келешегі талқыланған кеңесте атап көрсетті.
    Мәселен, Ресей Федерациясы аумағында мемлекеттік-жекеменшік әріптестік шеңберінде дистрибьютерлік компания немесе павлодарлық өндірушілердің сауда үйін құруға болады», - дейді Қ.Бозымбаев.
    Аймақ басшысы облыс өндірушілерінің біртұтас каталогын құруды ұсынды. Оның айтуынша, Павлодар облысы өңдеу өнеркісібі өнімдерін шығару бойынша  елде екінші орында алады (республикалық көлемнің 16,3%).
    Аймақта кәсіпкерлік белсенділіктің артуына «Павлодар» арнайы экономикалық аймақ ықпал етеді, дейді әкім. «Облыстың түсті металлургия мен мұнайхимия әлеуетін пайдалана отырып бізге жоғары деңгейде өнім өндіруге шығу қажет. Бұл бизнеске мүмкіндік береді, мысалы, алюминий нарығында 1 тонна үшін 1800-1900 $ баға кезінде ақырғы өнімді 4-5 мың $-ға сатуға болады», - дейді Қ.Бозымбаев.
    Кәсіпкерлермен кеңесте ол аймақтың туристік саласын дамыту бойынша шеберлік жоспары әзірлене бастағанын мәлімдеді. «Қуатты туристік кластер идеясы жылына 150 мыңнан астам турист баратын Баянауыл ауданында жүзеге аспақ. Мұнымен қоса Шербақты ауданы мен Ертіс өзені бойымен ішкі туризмді дамыту мүмкіндігі мол», дейді әкім.
    Аймақ басшысының айтуынша, бүгінгі таңда Павлодар облысында кәсіпкерлік саласында шамамен 123 мың адам, немесе барлық еңбекке жарамды тұрғындардың 30%-ы жұмыс істейді. Шағын және орта бизнестің белсенді субъектілер саны 34 мың бірлікті құрайды.
    Аймақтың инвестициялық тартымдылығын арттыру үшін биыл күзде Павлодарда «Ертісинвест – 2014» атты алғашқы инвестициялық форум өтеді.

Айдарлар мұрағаты