17.06.2014

Павлодар облысы жыл соңына дейін 800 тонна ет және ет өнімдерін экспортқа шығарады

            Павлодар. 17 маусым. ИНТЕРФАКС-ҚАЗАҚСТАН – Павлодар облысының кәсіпорындары 2014 жылдың соңына дейін шамамен 800 тонна ет пен ет өнімдерін экспортқа шығаруды жоспарлауда. Бұл туралы облыстық ауыл шаруашылық басқармасының басшысы Жанат Шұғаев бүгін аппараттық кеңесте мәлімдеді.

            «Бүгінгі таңда 215 тонна ет пен ет өнімдері экспортталды, оның ішінде «Рубик» ЖШС және «Павлодарлық Смак» ЖШС кәсіпорындары 195 тонна ет өнімін сыртқа шығарды», - дейді ЖүШұғаев.

            Оның айтуынша, бұл кәсіпорындар жыл соңына дейін Ресей Федерациясына (Красноярск, Омск, Новосибирск, Челябі, Сан-Петербург, Хабаров) 500 тоннадан астам ет өнімдерін өткізбек.

            Ж.Шұғаев мәлімдегендей, «Ақоба» ЖШС Ресей Федерациясына 20,4 тонна ет, «Шарбақты Құс» ЖШС Новосибирскіге 20 тонна ет экспорттады.

            Кеңес барысында облыс шаруашылықтарындағы ауылшаруашылық малдарын тізімге алу мәселесі талқыланды. Ж.Шұғаев атап көрсеткендей, жаңа ережелерге сәйкес, мемлекеттік қолдау шаралары ауылшаруашылық малды АМТ (ауылшаруашылық малын тізімдеу) электрондық деректер қорына және сұрыптау және асыл тұқым жұмысының ақпараттық қорына тіркеген жағдайда ғана көрсетіледі. Бүгінгі таңда облыс бойынша 79% ірі қара мал, 60% ұсақ тұяқ мал, 54% шошқа, 46% жылқы АМТ деректер қорына енгізілді.

            Павлодар облысының әкімі Қанат Бозымбаев кеңесте атап өткендей, бұл мәселені жыл соңына дейін шешу қажет. «Егер біз ереже талап етіп отырғандай, барлық ауылшаруашылық малын тізімдесек, бұл іс-қимылымыздың айқындығын, ең алдымен демеуқаржы бөлудің айқындығын білдіреді. Сонымен қатар, бұл мал ауруларына қарсы күресу үшін қажет. Толық анықтау кезінде малдың қай жақтан екені бірден белгілі болады. Шекара қасымызда. Тіпті ірі шаруашылықтар Ресейден жас мал әкеледі. Сондықтан жыл соңына дейін бұл мәселе шешімін табуы қажет», - дейді әкім.

Айдарлар мұрағаты