16.06.2014

Павлодар облысы индустрияландырудың бірінші бес жылдығында 1 трлн теңгенің жобасын жүзеге асырады

Павлодар. 16-маусым. ИНТЕРФАКС-ҚАЗАҚСТАН – Павлодар облысында үдемелі индустриалды-инновациялық даму бағдарламасының бірінші кезеңінде (2010-2014 жылдар) 85 жоба жүзеге асырылмақ. Оған 1 трлн 78 млрд 800 млн теңге инвестиция жұмсалады.

Атап айтсақ, соның ішінде 5 жоба (инвестиция сомасы 747 млрд 278 млн теңге) республикалық индустрияландыру картасына енгізілген, деп сенаттың экономика, инновациялық даму және кәсіпкерлік жөніндегі комитетінің көшпелі отырысында облыс әкімінің бірінші орынбасары Дүйсенбай Тұрғанов мәлім етті.

Жылдың соңына дейін аумақта селективті экстракция әдісі арқылы мыс өндіретін зауыттың құрылысы аяқталып, мұнай коксын қыздыру қондырғысы пайдалануға беріледі.

2015-2018 жылдары орындалуға тиіс бірқатар жобалар екінші бес жылдыққа өтпек. Оның ішінде Бозшакөл кен-байыту комбинатының құрылысы, Екібастұз ГРЭС-2 үшінші энергоблогы, Павлодар мұнай-химия зауытын жаңалау сынды жобалар бар.

Индустрияландыру бағдарламасы шеңберінде облыста арнайы экономикалық аймақ құрылады. 2014-2016 жылдары «Павлодар» арнайы экономикалық аймағын құру үшін 27,99 млрд теңге бөлінеді. Оның 3,5 млрд теңгесі 2014 жылы, 10 млрд теңгесі 2015 жылы, қалған 14,49 млдр теңгесі 2016 жылы бөлінуі тиіс.

Д.Тұрғановтың айтуынша, облыс аумағында «Қазсода» ЖШС жобасы жүзеге асырылып, кальцийлендірілген сода зауыты салынады. Оған салынатын инвестиция көлемі 77 млрд теңгеге, жұмыс орындарының саны 1500 жетпек.

Машина жасау саласында да айтарлықтай өзгерістер бар. Темір жол кластерін дамыту шеңберінде 2015 жылдан бастап «Қазақстандық вагон жасау компаниясы» негізінде жылжымалы құрам желісін игеру көзделген, деді облыс әкімінің бірінші орынбасары.

Кластерге қатысушы компаниялардың бірі іFormat Mach Company» ЖШС.

Айдарлар мұрағаты