06.06.2014

Соңғы үш жылда Павлодар облысында жөндеуді қажет ететін 567 шақырымдық жылу желісінің 48 шақырымы қалпына келтірілді – Тұрғын үй-коммуналдық шаруашылық басқармасы

            Павлодар. 6-маусым. ИНТЕРФАКС-ҚАЗАҚСТАН – Соңғы үш жылда Павлодар облысы аумағындағы қалаларда жөндеуді қажет ететін 567 шақырым жылу желісінің 48 шақырымы қайта қалпына келтірілді. Бұл туралы облыстық Тұрғын үй-коммуналдық шаруашылық басқармасы бастығы міндетін атқарушы Сайын Кәменов мәлім етті.

            «Жобалық-сметалық құжаттардың жоқтығына байланысты биыл Павлодардағы жылу желілері бюджет есебінен жөнделмейді», - деді ол бейсенбі күні әкімдікте өткен жиында.

            Оның айтуынша, Екібастұз қаласында тозығы жеткен жылу құбырларының үлесі 79 пайызға жеткен. 2011 жылы бұл көрсеткіш 77 пайыз шамасында болатын.

            Атап айтсақ, өткен жылу маусымында құбыр желелеріндегі ақаулар 2,5 есе артыпты. 2011-2013 жылдары «Павлодар жылу желілері» ЖШС инвестициялық бағдарлама есебінен жылу трассаларының 0,5 шақырымын ғана жөндеген.

            «Тозығы жеткен құбырларды қазіргі қалпында сақтап тұру үшін жыл сайын жылу желісінің кем дегенде 13 шақырымын қайта қалпына келтіріп отыруымыз керек», - деп қосты С.Кәменов.

            Өз кезегінде, Екібастұз қаласының әкімі Александр Вербняк жылу желілерін жаңғырту жөніндегі ТЭН 2015 жылдың наурыз айында дайындалатынын жеткізді.

            Ал, кеңеске қатысқан облыс әкімі Қанат Бозымбаев мұнымен келісуге болмайтынын кесіп айтты. «Кішкентай ғана қаланың ТЭН 9 ай бойы жасала ма? Желінің жылуды ең көп жоғалтатын жерлерін табыңдар да, сол учаскелердің ТЭН-сін жасаңдар. Жөндеуге қаражат табу – менің міндетім», - деді облыс басшысы.

Айдарлар мұрағаты