30.05.2014

Павлодар облысы Германияға инвестициялық жобалар ұсынуда

            Павлодар.30 мамыр. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев Германия делегациясымен кездесті, деп хабарлады облыс әкімінің баспасөз қызметінен.

            "Бүгінгі күнге қарағанда облыста Германиямен бірлескен 15 кәсіпорын жұмыс істеп отыр, олардың ішінде құрылыс-монтаж жұмыстары, автобус тасымалдау және басқасы бар.Аймақ әкімі неміс инвесторларына "Павлодар" арнайы экономикалық аумағы шеңберінде өз ара ықпалдастықты қарастыруды ұсынды, делінген онда.

            Облыс әкімі германдық компанияларға аталмыш аумақ аясында ғана бірлескен кәсіпорын құруды ғана емес, әлеуметтік салада, тұрғын үй коммуналды шаруашылық саласында да ынтымақтасуды ұсынды. "Оның ішінде денсаулық сақтау саласында ынтымақтасу ұсынылды. Аймақ әкімі Германияның жетекші емханаларында қазақстандық медицина қызметкерлері үшін стажировкадан өтуді ұйымдастыру мүмкіндігін қарастыруды ұсынды. Сондай-ақ ол Германиядан мамандарды шақыра отырып, Павлодар облысының медицина мекемелерінде мастер-кластар өткізуді ұсынды", делінген баспасөз хабарламасында.

Павлодар облысында Германиядағы Қазақстан елшісі Нұрлан Онжанов, Германия Бундестагының мүшесі Аксель Фишер, Эттлинген қаласы кеңесінің мүшесі Хайнц-Бернхард Петерс болды.

            Қазіргі уақытта Павлордар облысының Германиямен арадағы тауар айналымы жылына 117,8 млн долларды құрап отыр, оның ішінде импорт –117,3 млн доллар, экспорт - 0,5 млн доллар. Аймақ саудасының жалпы көлемінде Германия үлесі 3% құрайды. Павлодар аумағынан Германияға металлургия өнеркәсібінің өнімдері жолданады (қара металл сынықтары, алюминий, мыс және хром рудасының концентраттары). Павлодар облысы кәсіпорындарының қажеттілігі үшін Германиядан негізінен алғанда машина құрылысының заттары әкелінеді –көлік құралдары, арнайы техника, жабдықтар, қосалқы бөлшектер.

            Германиямен "Еуразиялық энергетикалық компания" АҚ, "Қазақстандық электролиз зауыты" АҚ, "Павлодар мұнай химия зауыты" ЖШС, "Богатырь Көмір" ЖШС, "KSP Steel" ЖШС кәсіпорындары және орта бизнестің бірқатар кәсіпорындары ынтымақтасып отыр.

Айдарлар мұрағаты