11.04.2016

Павлодар облысының басшылары диқандарды ауыл шаруашылық кооперативтеріне бірігуге шақырды

Павлодар. 11-сәуір. ИНТЕРФАКС-ҚАЗАҚСТАН – Павлодар облысының әкімі Болат Бақауов өңірдегі ұсақ және орта фермерлерді өндірістік ауыл шаруашылық кооперативтеріне бірігуге шақырды. Бұл туралы дүйсенбі күні облыс әкімдігінің баспасөз қызметі хабарлады.

Аймақ басшысының айтуынша, бұл диқандарға бірқатар артықшылықтар мен мүмкіндіктер береді.

Хабарламаға сүйенсек, егіншілік мәдениетінің төмендігі, тауардың аздығы,м техника паркінің әбден тозығы жетуі Павлодар облысындағы астықты аудандардың негізгі проблемасына айналған. Бұл мәселелерді шешу үшін бір жыл ішінде шаруаларды кредиттік серіктестіктер жүйесіне біріктіру жұмыстарын ұйымдастыру қажет.

Шағын және орта фермерлер кредиттік серіктестік есебінен қаржыландырылады. Ауыл шаруашылық министрлігі егіс алқаптарының әр гектарына бөлінетін төлемдерді тиімсіз деп таныған болатын. Бұдан былай бюджеттен бөлінетін қаржы жаңа техникаға инвестицияланады. Бұл жерде фермер алған техниканың жалпы құнының 30 пайызын өтеп беретін лизингтік бағдарлама туралы әңгіме болып отыр. сонымен қатар, диқандарға сапалы тұқым, тыңайтқыштар мен гербицид сатып алу жағынан қолдау көрсетілмек.

Сондай-ақ, Павлодар облысының әкімі Б.Бақауов өңірде кооперация қағидасымен жұмыс істейтін машина-трактор станцияларын (МТС) салу қажеттігін атап өтті.

"Бұл агротехникалық қызмет түрлерін көрсететін сервистік кооператив болып табылады. Оған 400-ге жуық шаруа қожалығы кіреді. Аудан әкімдері оның барлық тетіктерін қарастырып, кепілдікті, жеңілдігі бар несиені қалай алуға болатынын, кредиттік серіктестікке МТС құруға көмектусе жолдарын жан-жақты ойластыруы тиіс", - деді аймақ басшысы.

Б.Бақауов өз өнімдерін дайындап, сататын тұрмыстық кооперативтер ашуды ұсынды.

"Бұл бұрын ортадағы делдалдардың қолында қалатын табыстың қолға тиюіне мүмкіндік береді. Мұндай ұйымдар ауыл шаруашылық жәрмеңкелері сияқты жұмыс істейді", - деп түсіндірді ол.

Айдарлар мұрағаты