20.11.2015

Биылғы жылы Павлодар облысы ет өнімдері экспортын 11,8 пайыз арттырды

Павлодар. 20-қараша. ИНТЕРФАКС-ҚАЗАҚСТАН – Павлодар облысы жыл басынан бері ет өнімдері экспортын 1 мың тоннаға жеткізді. Бұл туралы облыс әкімі Қанат Бозымбаев хабарлады.

2014 жылы аймақ 894,3 тонна ет экспорттаған болатын.

Осылайша, биылғы жылы ет экспорты 11,8 пайыз артты.

«Облысымыз аталған көрсеткіш жағынан осымен екінші жыл қатарынан бірінші орында келеді. «100 нақты қадам» ұлттық жоспары шеңберінде шикізатты өңдеу мен ауыл шаруашылық өнімдерін экспорттауға ерекше ден қойылып отыр. Бұл агроөнеркәсіп саласын дамыту тұрғысынан да, аймақта азық-түлік қауіпсіздігін қамтамасыз ету жағынан да үлкен маңызға ие», - деді Қ.Бозымбаев жұма күні ауыл шаруашылығы қызметкерлерімен кездесуде.

Биылғы жылы облыстағы аудандардан жаңадан 17 өңдеу нысаны салынып, тағы бесеуі қайта жаңғыртылды.

Аймақ басшысының айтуынша, облыста аграрлық сектордағы кәсіпорындардың инвестициялық белсенділігі артып келеді. Биыл жалпы құны 5 млрд теңгеден асатын 140 жоба іске асырылды. Олар кәсіпорындардың өз қаржысы мен заем есебінен және инвестициялық субсидиялау бағыты бойынша қаржыландырылды.

Өңірде сүт-тауар фермалары, тұқымдық мал өсіретін репродукторлар, астық және көкөніс сақтайтын қоймалар пайдалануға берілді. Жақын уақытта тағы 20 жобаны іске асыру көзделіп отыр.

Павлодар облысы халқының саны 740 мыңнан асады.

Айдарлар мұрағаты