13.11.2015

Павлодардағы Экотехнологиялар орталығы ERG құрамындағы кәсіпорындармен ынтымақтастық жөнінде келісім бекітті

Павлодар. 13-қараша. ИНТЕРФАКС-ҚАЗАҚСТАН – Павлодарда құрылған Экотехнологиялар жөніндегі өкілеттіктер орталығы Еуразиялық топ құрамындағы (ERG) – «Қазақстан электролиз зауыты», «Қазақстан алюминийі» АҚ, «Қазхром» АҚ Павлодар филиалы сынды компаниялармен ынтымақтастық жөнінде келісім бекітті. Бұл туралы жұма күні облыс басшысының баспасөз қызметі хабарлады.

Сонымен қатар, орталық пен «CleanTech» (Латвия) компаниясы экология мәселелері жөнінде ынтымақтастық орнату туралы келісті.

Орталық өңірді дамытудың 2030 жылға дейінгі стратегиясы шеңберінде құрылды. Орталық қызметі тұжырымдамасын әзірлеуге қазақстандық «EcologyExpert» (Алматы), «Мұнай-экология» және «ЭкоАудит-НС» (Астана) компанияларымен қатар, халықаралық компаниялардың өкілдері қатысты. Олардың арасында экологиялық жобаларды басқару, гранттар мен инвестициялар тарту саласында тәжірибесі мол FiW (Германия) және «CleanTech» (Латвия) сынды компаниялардың сарапшылары да бар. Олар Германия, Қытай мен Малайзияда осындай орталықтар ашуға қатысқан мамандар.

Орталық өнім өндіретін және экология саласында технологиялар трансферттеумен айналысатын (су, ауа, топырақты тазарту, қалдықтарды өңдеу т.б.) компанияларды, ғылыми-зерттеу ұйымдарын, сондай-ақ, экология саласында кәсіби қызмет көрсететін компанияларды дамыту бағытында жұмыс істейді.

Айдарлар мұрағаты