Жаңартылды: 23.02.2018, 12:13 (АСТ)

11.11.2015

Павлодар облысында тұрақтандыру қоры құрылды


Павлодар. 11-қараша. ИНТЕРФАКС-ҚАЗАҚСТАН – Павлодар облысында қыс маусымына арналған тұрақтандыру қоры құрылды. Бұл туралы сәрсенбі күні облыс әкімдігінің баспасөз қызметі хабарлады.

Баспасөз қызметі таратқан хабарламаға сүйенсек, «Павлодар» әлеуметтік-кәсіпкерлік корпорациясының тұрақтандыру қорына өңірде өндірілмейтін өнімдер, атап айтқанда, 203 тонна қант, 24,8 тонна күріш, 200 тонна пияз жеткізілді.

Сонымен қатар, жергілікті диқандардан қыс-көктем маусымына арнап бекітілген баға бойынша 10 мың тонна картоп, 1 мың тонна сәбіз, 200 тонна қызылша, 600 тонна қырыққабат сатып алынды. Бұл өнімдерді әлеуметтік дүкендер 2016 жылдың мамырына дейін белгіленген баға бойынша сатады.

Хабарламаға сүйенсек, бекітілген меморандум бойынша қарашаның бірінде өңдеуші кәсіпорындар әлеуметтік сауда желілері мен жәрмеңкелерге арнап күнбағыс майын сата бастады. Оның литрі 240-260 теңге аралығында. Қарақұмық жармасы да осы схема негізінде сатылып жатыр. Бүгінде аймақтағы әлеуметтік дүкендер мен ауыл шаруашылық жәрмеңкелерінде қарақұмықтың келісі 180 теңгеден сатылуда.

Дегенмен, Павлодар облысында азық-түліктің бірқатар түрлерінің бағасы өскені байқалады. Облыс басшысы баспасөз қызметінің мәліметінше, жергілікті «Шарбақты құс» ЖШС құс фабрикасы жұмыртқа бағасы 5,7 пайыз өсірген. Мәселен, 1-санаттағы жұмыртқаның бағасы 18,5 теңгеге дейін көтерілді.

Биылғы жылдың IV тоқсанында бірінші сұрып ұн өндірісіне бөлінетін субсидия екі есе қысқарды (тоннасына 2500 теңгеге дейін). Салдарынан бұрын 50 теңгеден сатылған әлеуметтік бөлке нан бағасы 54 теңгеге қымбаттады. Бөлшек саудадағы нан бағасы жылдың соңына дейін 58 теңгеден аспауы тиіс.

Бұған дейін хабарланғандай, Ауыл шаруашылық министрлігі 2016 жылдың 1-қаңтарынан бастап әлеуметтік нанға субсидия бөлуді тоқтатады. Келесі жылы Павлодар облысында бір бөлке нанның бағасы 65 теңге шамасында болуы тиіс.

Павлодар облысында 740 мың халық тұрады.


Айдарлар мұрағаты

Баспасөз орталығы



Error message here!

Show Error message here!

Close