21.09.2015
Қытайлық корпорация Павлодарда химия-металлургия комбинатын салуға инвестиция бөлуі мүмкін
Павлодар. 21 қыркүйек. ИНТЕРФАКС-ҚАЗАҚСТАН – Қытайлық China Machinery Engineering Corporation корпорациясы Павлодар облысындағы арнайы экономикалық аймақ аумағына химия-металлургия комбинатын салуға инвестиция бөлуі мүмкін. Бұл туралы облыс әкімдігінің баспасөз қызметі хабарлады.
Хабарламаға сүйенсек, аталған мәселе Павлодар облысының әкімі Қанат Бозымбаев пен China Machinery Engineering Corporation басқарушы директоры Ван Ливэньнің кездесуінде талқыланды.
Кездесу нәтижесі бойынша жобаны іске асыратын «Tenir-Logistic» ЖШС мен China Machinery Engineering Corporation арасында өзара түсіністік туралы келісім, сондай-ақ, «Tenir-Logistic» ЖШС мен «KSP «Steel» ЖШС арасында өнім жеткізу туралы келісім бекітілді.
«Тenir-Logistic» ЖШС титан диоксиді, кремний диоксиді мен шойынның арнайы түрлерін өндіретін химия-металлургия кешенін салуды жоспарлап отыр. Бастапқы техника-экономикалық негіздемеге сүйенсек, кен-байыту комбинаты Жамбыл облысының Тымлай кенішінде орналаспақ. Ал, ақырғы өнімді шығаратын химия-металлургия комбинатын «Павлодар» арнайы экономикалық аймағы аумағына салу жоспарланған. China Machinery Engineering Corporation комбинат құрылысына инвестиция салып, қажетті қондырғыларды сатып алуға және өндірісті іске қосуға дайын.
Облыс басшысы баспасөз қызметі таратқан мәліметтерге сүйенсек, Павлодар облысы мен ҚХР арасындағы сауда-саттық көлемі 2014 жылы 184 млн долларға жеткен. Қытай жергілікті кәсіпорындарды қондырғылармен қамтамасыз ететін негізгі мемлекеттің бірі. Өз кезегінде, Павлодар облысы Қытайға полипропилен мен күнбағыс дәндерін жеткізеді. Үгінгі күнге дейін өңірде қытайлық компаниялардың қатысуымен Бозшакөл КБК құрылысы, мұнай коксын қыздыратын зауыт құрылысы сынды жобалар іске асырылып жатыр.
China Machinery Engineering Corporation электр энергетикасы, көлік, байланыс, коммуникациялар, құрылыс, архитектура, қоршаған ортаны қорғау, ресурстарды барлау және өндіру сынды салаларда мердігерлік қызмет көрсетеді.
Айдарлар мұрағаты
