19.06.2015

Павлодар облысындағы өнеркәсіп ошақтары 2015 жылы табиғат қорғау шараларына 14 млрд теңге жұмсайды

Павлодар. 19 маусым. ИНТЕРФАКС-ҚАЗАҚСТАН – Павлодар облысындағы өнеркәсіп ошақтары 2015 жылы табиғат қорғау шараларына 14 млрд теңге жұмсайды. Бұл туралы облыстық экология департаменті хабарлады.

«Облыс бойынша жалпы ауаға тасталатын зиянды қалдықтардың 85-86 пайызы ірі кәсіпорындардың еншісінде. Жыл сайын табиғат қорғау шараларына бөлініп отырған қаржы өндіріс көлемінің артқанына қарамастан, ауаны ластайтын заттардың мөлшерін азайтуға мүмкіндік берді», - делінген хабарламада.

Биылғы жылы «Қазақстан алюминиі» компаниясы жаңа Байер технологиясын пайдалануды көздеп отыр. Ол ауаға тасталатын лас қалдықтарды едәуір төмендетуге мүмкіндік береді. Сонымен қатар, заманауи технология өндіріс пен тұтыну қалдықтарының санын азайтуға көмектеседі.

Ал, «Павлодар мұнай-химия зауыты» ЖШС пештердегі отындық бүріккіштерді ауыстырды. Бұл да экологияны қорғауға едәуір септігін тигізеді.

Экологиялық департаментінің мәліметінше, 2014 жылы Ақсу ферроқорытпа зауытында №45, №46 пештерге газ тазарту құрылғысын салу жұмыстары басталған болатын. Жұмыс аяқталғаннан кейін 2016 жылдан бастап пештерден ауаға шығарылатын ас қалдықтар 580 тоннаға қысқармақ. Ал, 2014 жылы іске қосылған №41 пештің газ-тазарту қондырғысы жыл сайын ауаға тасталатын лас заттарды 31,56 тоннаға қысқартыпты.

Өткен жылы облыс аумағындағы өнеркәсіп ошақтары табиғат қорғауға 18,2 млрд теңге жұмсады.

Айдарлар мұрағаты