25.06.2015
ERG тобы Павлодар облысында тұрғын үй құрылысына 4,4 млрд теңге бөлетін болды
Павлодар. 25 маусым. ИНТЕРФАКС-ҚАЗАҚСТАН – Eurasian Resources Group (ERG) мен Паылодар облысының әкімдігі ERG тобына қарасты кәсіпорындардың қызметкерлеріне арналған тұрғын үй бағдарламасын іске асыру барысында ынтымақтастық орнату туралы меморандум бекітті.
Облыс әкімдігі баспасөз қызметінің хабарлауынша, құжатқа Павлодар облысының әкімі Қанат Бозымбаев пен ERG тобы басшысы Александр Машкевич қол қойды.
«Биыл Еуразия тобы көп жылдық ынтымақтастық дәстүрінің жалғасы ретінде аймақты дамыту бағдарламасы шеңберінде салынатын тұрғын үй жобаларына 4,4 млрд теңге бөлуді өз мойнына алып отыр», – делінген хабарламада.
«2016-2017 жылдары Павлодар, Екібастұз және Ақсу қалаларында ERG тобының қарамағындағы «Қазақстан алюминиі» АҚ, «Қазақстан электролиз зауыты» АҚ, «ЕЭК» АҚ, Ақсу ферроқорытпа зауыты сынды кәсіпорындардың қызметкерлеріне арнап жалға берілетін 8 үй (640 пәтер немесе 35,8 мың шаршы метр) салу жоспарланып отыр», - деп атап өтті облыс әкімі.
Қол қойылған құжатқа сәйкес, Павлодар облысының әкімдігі ERG тапсырмасы бойынша Павлодар, Ақсу және Екібастұз қалаларында тұрғын үй салып, пайдалануға беру жұмыстарын кешенді түрде атқара алатын ұйымдар туралы ақпарат жинауды өз мойнына алды.
Сонымен қатар, жергілікті атқару органдары әкімдіктеден жер телімдерін алуға, ІІІ және ІҮ санаттағы үйлерді салуға қажет рұқсат қағаздарын алуға қолұшын бермек. Аймақты дамытудың 2020 жылға дейінгі бағдарламасы шеңберінде салынатын бұл үйлердің иелеріне болашақта оны сатып алу құқығы беріледі. Сондай-ақ, құрылыс нысандарына инженерлік-коммуникациялық инфрақұрылымдар тартуға көмектеспек.
Өз кезегінде ЕRG тобы тұрғын үй бағдарламасы бойынша салынатын үйлерге қаражат бөліп, оны іске асыруға көмектеседі.
Топ 2013 жылы желтоқсан айында боксит, темір, хром, марганец, мыс рудалары мен көмір өндіретін, алюминий, ферроқорытпалар мен мыс шығаратын ENRC компаниясын сатып алу туралы келіссөздерді аяқтаған болатын. Еуразиялық топ Қазхром, Жайрем КБК, Соколов-Сарыбай кен-байыту өндірістік бірлестігі, Қазақстан алюминиі, Қазақстан электролиз зауыты, Еуроазиялық энергетикалық корпорация (ЕЭК), Шұбаркөл Көмір және ENRC Logistics активтерін басқарады.
Айдарлар мұрағаты
