16.06.2015

Павлодар облысында 2015 жылы жолдарды салу мен жөндеуге 55 млрд теңге жұмсалмақ

Павлодар. 16 маусым. ИНТЕРФАКС-ҚАЗАҚСТАН - 2015 жылы Павлодар облысында автомобиль жолдарын жөндеуге, салуға және қайта құруға 54,7 млрд теңге бөлінді, деп хабарлады облыс әкімінің баспасөз қызметінен.

"Бұл қаржының ішінен жолдарды салу мен қайта құруға - 50 млрд теңге, күрделі жөндеуге- 2,6 млрд теңге, орташа жөндеу жұмыстары үшін- 1,1 млрд теңге, жолдарды күтіп ұстау үшін– 950 млн теңге көзделген", - делінген сейсенбіде баспасөз қызметінен таралған ақпаратта.

Ал көктемгі су тасқыны кезінде бүлінген Қалқаман–Баянауыл–Үміткер-Ульяновский республикалық мәні бар жолға келер болсақ, оны қалпына келтіру жұмыстары жүргізілген, шеттері мен жақтаулары реттелген, көлік үздіксіз жүріп жатыр, делінген хабарламада.

Сонымен қатар,Бірлік және Теңдік селолары қасындағы көпірлердің жобалық жұмыстары мемлекеттік сараптамадан өтуде.

Хабарламаға қарағанда, 2015 жылы Павлодар облысында республикалық мәні бар жолдарда құрылыс пен қайта құру жұмыстары тоғыз нысанда жүргізіліп отыр.

Сонымен қатар Павлодарға кірмей өтетін Астана-Павлодар жолын Ертіс өзеніндегі көпір арқылы Павлодар-Семей жолымен қосатын көлік айырымын салу көзделген.

Жобаға орай мемлекеттік қажеттілік үшін мұнда 162 саяжай алынуға тиіс. Қазіргі уақытта Ертіс өзіне арқылы көпір өтпелін салу жобасы жүзеге асырылуда.

Облыстық және аудандық мәні бар жолдарды жөндеуге 2015 жылы 3517,4 млн теңге бөлінген, оның ішінде республикалық бюджеттен – 709,5 млн теңге. Облыстық және аудандық мәні бар жолдардың 216 шақырымын жөндеу көзделген, делінген хабарламада.

Айдарлар мұрағаты