21.05.2015

Павлодардағы үшінші ЖЭО-на Урал турбина зауытынан жаңа қондырғылар жеткізілді

Павлодар. 21-мамыр. ИНТЕРФАКС-ҚАЗАҚСТАН – Павлодардағы №3 ЖЭО («Павлодарэнерго» АҚ құұрамына кіреді) жаңғырту бағдарламасы шеңберінде Урал турбина зауытынан жаңа қондырғылар жеткізілді. Бұл қондырғылар екінші турбинаны жаңғыртуға пайдаланылмақ, деп хабарлайды кәсіпорынның баспасөз қызметі.

«2014 жылдың желтоқсан айында станцияда бірінші турбина пайдалануға берілген болатын. Қазір ЖЭО-да екінші турбина іске қосылғалы жатыр. Ал, жыл соңына дейін үшінші турбинаға арналған қондырғылар жеткізіледі», - делінген хабарламада.

Турбиналарды жаңғырту Павлодар ЖЭО3 инвестициялық бағдарламасы шеңберінде жүргізіліп жатыр. Жаңғырту нәтижесінде қондырғылардың ресурсы қалпына келтіріледі. Яғни, турбиналарды пайдалану мерзімі 220 мың сағатқа немесе тағы 30 жылға ұзарады. Сонымен қатар, әр турбинаның электр қуаты 20 МВт дейін ұлғаяды.

Баспасөз қызметінің хабарлауынша, әрбір турбоагрегатты жөндеуге 6 млрд теңге жұмсалған. Құрылыс-монтаж жұмыстары, сараптама және тағы да басқа жұмыстар осы соманың ішінде.

«Павлодарэнерго» АҚ құрамына 3 жылу-электр орталығы кіреді: қуаты 505 МВт болатын ТЭЦ-3, қуаты 110 МВт ТЭЦ-2 және қуаты 12МВт Екібастұз ЖЭО.

Айдарлар мұрағаты