13.04.2015

Павлодар облысының билігі тасқынға қатысты ахуалды қатаң бақылауда ұстап отыр

Павлодар. 13 сәуір. ИНТЕРФАКС-ҚАЗАҚСТАН – Павлодар облысының әкімі Қанат Бозымбаев облыстық ТЖ департаменті қызметкерлерімен бірге тасқын қаупі туындап отырған елді мекендерді тікұшақпен барлап шықты.

«Күннің күрт жылынуына байланысты Павлодар облысы аумағында, әсіресе, Баянауыл, Лебяжі, Май және Шербақты аудандарында қар жылдам еріп жатыр», - деп дүйсенбі күні облыс әкімдігінің баспасөз қызметі хабарлады.

Әкімдік мәліметіне сүйенсек, өткен сенбі күні Баянауыл ауданындағы Теңдік ауылында 10 тұрғын үй мен 9 шаруашылық нысанын су басу қаупі туындаған.

Соған байланысты ауыл шетіндегі 10 үйдің тұрғындары мен 160 бастан астам мал қауіпсіз жерге көшірілді. Қазір тұрғындар үйлеріне толығымен қайтып оралды.

Аймақ басшысы жағдайды жеке бақылауына алды. Тиісті орындарға жергілікті жерде сағат сайын бақылау жүргізіп, елді мекендердің тұрғындарымен арадағы байланысты үзбеу туралы тапсырма берілді.

Сондай-ақ, Қ.Бозымбаев барлық қызмет орындары мен апат-құтқару қызметіне барлық елді мекендерде қауіп сейілгенге дейін тәулік бойы күзет қою және халықтың қауіпсіздігін қамтамасыз ететін мекемелердің үздіксіз жұмыс істеуін қамтамасыз ету жөнінде тапсырма берді.

Айдарлар мұрағаты