Жаңартылды: 21.05.2018, 17:57 (АСТ)

Air Astana әуе компаниясының президенті Питер ФОСТЕР:
АВИАЦИЯЛЫҚ ҚАУІПСІЗДІК – AIR ASTANA КОМПАНИЯСЫНЫҢ БАСТЫ ҚҰНДЫЛЫҒЫ


Астана. 14 сәуір. ИНТЕРФАКС-ҚАЗАҚСТАН Қазақстанның ірі әуе тасымалдаушысы - "Air Astana" компаниясы биылғы жылы өз жолаушыларын Париж, Тбилиси, Сеулге жеткізетін жаңа әуе бағыттарымен қуантты... "Air Astana" әуе компаниясының президенті Питер ФОСТЕР «Интерфакс-Қазақстан» агенттігімен болған эксклюзивті сұқбатында өз болжамдары мен жоспарлары, клиенттермен жұмыс қағидалары туралы әңгімеледі.

 

- Фостер мырза, компанияның 2015 жылғы жоспарлары мен болжамдары қандай, жыл қорытындысы бойынша қандай пайда көресіздер, жолаушылар ағынына қатысты болжамдарыңыз қандай?

- Біз 2015 жылдың соңына дейін 3,9 миллион жолаушы болады деп болжаймыз. Биылғы жылы біз алып жүру сыйымдылығын 7%-ға арттырмақпыз. Жаңа бағыттар ашумен қатар, биыл жазда біз Астанадан Пекин, Сан-Петербург, Омск, Бішкек, Өскемен, Шымкент, Ақтау және Қызылорда бағыттарына ұшу жиілігін арттырамыз. 2015 жылы рентабельділік 5% деңгейде күтіледі. Болжамды қаржы нәтижелеріне қол жеткізу үшін Қазақстан экономикасында баға тұрақтылығы маңызды шарт болып табылатынын айта кеткен жөн.

 

- Биылғы жылы жаңа бағыттар ашу жоспарда бар ма? Алдағы уақытта қандай жаңа әуе бағыттарын ашпақсыздар?

- 2015 жылы біз Астанадан Париж, Тбилиси, Сеул және Оралға қатынайтын жаңа әуе бағыттарын ашамыз, сонымен қатар Қостанайдан Ганноверге және Алматы мен Астанадан Антальяға маусымдық бағыттарды қайта қалпына келтіреміз. Астанадан Парижге баратын ұшақ бағыты іс жүзінде Алматыдан басталады, осылайша Алматы мен Астана бағытына қатар қызмет атқарады.

 

- Cіздің компанияда бұзақы жолаушылардың «сұр тізімі» бар екені мәлім. Бұл тізімде неше адам барын айтып бересіз бе? Олар бұл тізімге қандай заң бұзушылықтары үшін енгізілді? Сіздердің «сұр тізімге» енгізілген жолаушыларға қандай шара қолданылады?

- Қазіргі уақытта компаниямыз "Watch List" деп атайтын «сұр тізімге» 14 жолаушы енгізілген. Бұл тізімге енген жолаушылар ұшу қауіпсіздігі үшін, сондай-ақ қызметкерлер құрамы мен жолаушылар қауіпсіздігі үшін айтарлықтай қауіп туғызды. Жолаушылардың әрекеті басқа жолаушылар мен әуе компаниясының қызметкерлерінің жарақаттануы, сондай-ақ ұшақтың бағытынан ауытқуын қосқанда, әуе кемесінің қауіпсіздігіне нұқсан келтірді. "Watch List"-ке енген жолаушылар арасында ең көп таралған заң бұзушылықтар темекі шегу, мас болып, күш қолдануға байланысты.

Авиациялық қауіпсіздік «Эйр Астана» әуе компаниясы үшін басты құндылық болып табылады. Ұшу, экипаж бен жолаушылар қауіпсіздігіне қол сұғушылық пен қауіп төндіру әрекеттеріне жол жоқ, тәуекелдікті барынша азайту үшін мұндай әрекеттердің мүмкіндігінше жолын кесу керек. "Watch List"-ке енгізілетін жолаушы үшін онлайн-тіркелуге шектеу қойылады, әуежайдағы тіркеу орнында оған бүкіл ұшу уақытында әрекеті бақыланатыны туралы ескерту табыс етіледі.

 

- Билеттерді арзан бағамен сатуға сұраныс пен қызығушылық көп. Биыл мұндай шаралар өткізу жоспарда бар ма? Компания 2015 жылы осындай қанша шара өткізбек?

- Әуе компаниямыздың промо-тарифтері, сіз айтқандай, сұранысқа ие және өте тартымды. Біз жыл бойы мақсаттары мен нәтижелері әр түрлі көптеген промо-акциялар өткіземіз. Мәселен, таяуда Алматыдан Астана арқылы Парижге қатынайтын жаңа бағыттың ашылғанынан хабардар етуге арналған арнайы промо-акция өткізілді. Бұл секілді шаралардың тарифтері өте тартымды болады. Ол кезде Алматы-Астана-Париж бағытымен барып-келу бағасы салықтар мен алымдарды қосқанда, 89 мың теңгені құрады. Олар тактикалық сипатта және тұтынушылар назарын аударуға және сатуды ынталандыруға бағытталған. Бұл қысқамерзімдік шара қандай да бір деңгейде бірегей болып табылады, өйткені арнайы тарифтер кез келген уақытта, біз ұшуларды жүзеге асыратын Қазақстанның барлық қалаларынан сапарға аттануға бағытталған, бұл жағдайда егер жолаушыға Францияға виза алуға рұқсат болмаған жағдайда билетті айыппұлсыз кері тапсыруға және ұшу уақытын өзгертуге мүмкіндік беріледі.

Өзге промо-акциялар бұған қарағанда құрылымдырақ болады. Мысалы, бізде жыл бойы сатып алуға болатын бірқатар алдын ала сатылым тарифтері бар. Олар ішкі және халықаралық бағыттарға қолданылады. Әуе компаниямыздың ресми сайтына кірушілер қай уақытқа арнайы тарифтер барын көруі үшін «Алдын ала сату» деп аталатын қосымша терезені пайдалана алады. Бұл клиенттерімізге өзіне тиімді тарифті таңдап, сапарын ұтымды пайдалануына мүмкіндік береді.

Таяуда ғана біз тағы бір промо-акцияны іске қостық. Оған сәйкес, ата-анасымен немесе қамқоршысымен Қазақстаннан Біріккен Араб Әмірліктеріне (Дубай және Абу-Даби) сапар шегуші балалар тегін ұшу мүмкіндігіне ие болды. Бұл ұсыныс осы бағыттар бойынша жазғы уақытта сұраныс азайған кезеңдерде ұшуға қолданылады.

Біздің акциялар көбінесе сұраныс алғаш күткендегідей болмаған бағыттарға қолданылады. Сондықтан қай жылы қандай акция өтетінін, қандай бағыттарды қамтитынын алдын ала болжау қиын. Бұл біздің ұшу бағыттарымызға деген жалпы сұранысқа байланысты болмақ. Әрбір жылы мұндай шараларды жаңа жылдық мерекелерде өткізу ықтималдығы жоғары екенін ғана айта алам, сұраныс аздау бағыттарға күзде баға төмендетілуі мүмкін, сондай-ақ Ұлы Отан соғысы ардагерлеріне арнайы акциялар бар, мұнда тек әуежайлық жолаушылар алымы ғана төленеді.

 

- Киев бағытында қатынайтын әуе ұшақтарының жағдайы қалай?

- Бүгінгі таңда Украина аумағына баратын ұшақтарға сұраныс біршама азайған. Былтырдан бері Air Astana Алматы мен Киев арасындағы бағыттар санын аптасына алтыдан үшке дейін қысқартты. Астана мен Киев арасындағы ұшақ бағыты тоқтатылды. Біз сұраныс қайта қалпына келетініне, екі ел арасындағы нарыққа толық қызмет көрсетіп қана қоймай, Қазақстанның Киев пен Үндістан, Таиланд, Гонконг, Малайзия, Қытайдағы біздің белгіленген нүктелер арасындағы транзиттік торап ретіндегі ұстанымын қайта жақсартамыз деген сенімдеміз.

 

- Qazaq Air жаңа әуе компаниясымен қандай да бір жұмыс алгоритмі бар ма? Қалай өзара іс-қимыл жүргізесіздер?

- Air Astana Qazaq Air компаниясымен келісім бекітуді жоспарлайды. Оған сәйкес, жолаушылар қолайлы түйісулер арқылы біздің әуе компаниясы мен Qazaq Air компаниясының бағыттық желілері арасында трансферді жүзеге асырады.

 

- Қазіргі кезде «Самұрық-Қазына» әл-ауқат қоры "BAE Systems"-пен Air Astana компаниясының «халықтық» IPO-ға шығуы туралы келіссөздер жүргізуде ме?

- Қазіргі таңда «Самұрық-Қазына» мен "BAE Systems" арасында IPO мәселесі бойынша келіссөздер жүргізіліп жатқан жоқ, алайда біз, келешек даму үшін капитал нарығына мүмкіндікті қамтамасыз ету үшін IPO-листинг таяудағы үш-төрт жылда өткізіледі деп пайымдаймыз.

 

- Компанияның халықаралық бағыттарда жүк тасымалын жүзеге асыра бастау туралы жоспарында бар ма?

- Таяу уақытта әуе компаниясы мамандандырылған жүк тасымалын енгізуді көздеп отырған жоқ, бірақ жүктерді өзінің жолаушылар ұшақтарындағы жүктерге арналған бөліктерімен тасымалдауын жалғастырады.

 


Сәуір, 2015
© 2018 "Интерфакс-Қазақстан" агенттігі
Пайдаланғанда сілтеме жасау міндетті


Айдарлар мұрағаты

Error message here!

Show Error message here!

Close